Тошкент шаҳрида янги экспресс автобус йўналиши ташкил этиш режалаштирилмоқда, деб хабар қилди шаҳар транспорт бошқармаси ахборот хизмати.
Қайд этилишича, 20,5 километр масофали ушбу йўналиш 4 та жадвал асосида 23 дақиқалик оралиқ интервал билан ҳаракатланади.
Автобус Чилонзор буюм бозори автошоҳбекатидан Бунёдкор, Фурқат, Себзор, Аҳмад Дониш кўчалари орқали Тошкент ҳалқа автомобиль йўлида жойлашган Учқаҳрамон бозори яқинидан қайрилиб олиб, Юнусобод мавзеси 12-даҳа охирги бекатига қадар йўловчи оқими гавжум катта оралиқ бекатларда тўхтаб ҳаракатланади.
«Йўлкира нархи 3000 минг сўм этиб белгиланади», — дейилади хабарда.
Эслатиб ўтамиз, аввалроқ Тошкентда 7 та янги автобус йўналиши ташкил этилиши хабар қилинганди. Шунингдек, Ўзбекистон бўйлаб 310 та янги автобус йўналишлари ташкил этилиши, Тошкентдан «Ташморе»гача алоҳида йўлакда ҳаракатланувчи тезюрар автобуслар йўлга қўйилиши тўғрисида хабар берилган.
Изоҳ (0)