Samarqand viloyatidagi gaz zapravka 5,4 milliard so‘mlik gazdan noqonuniy foydalangani aniqlandi. Bu haqda Energetika vazirligi matbuot xizmati xabar berdi.
Qayd etilishicha, Energetika vazirligi, “O‘zneftgazinspeksiya” va “Hududgaz Samarqand” gaz ta’minoti filiali xodimlari bilan hamkorlikda Samarqand viloyatida o‘tkazilgan tadbir davomida Narpay tumani, “Tepa” MFY hududida faoliyat yuritayotgan avtomobillarga gaz to‘ldirish kompressor shoxobchasining tabiiy gazdan foydalanish holati nazorat qilingan.
O‘tkazilgan nazorat tadbirida gaz hisoblash uskunasidan tashqari, AGTKSh hududidan o‘tuvchi “Oromgoh” kichik sanoat zonasini tabiiy gaz bilan ta’minlovchi kesimi 159 millimetrli gaz tarmog‘iga yashirincha o‘zboshimchalik bilan ulanib, tabiiy gazdan foydalanayotgani ma’lum bo‘lgan.
Qayd etilishicha, ushbu noqonuniy holat bo‘yicha dastlabki hisoblangan gaz hajmi 5 million 424 ming metr kubni va yetkazilgan zarar miqdori 5 milliard 424 million so‘mni tashkil etgan. Mazkur hajmdagi tabiiy gaz 300 ming xonadonning bir kunlik iste’moliga teng.
Yuqorida qayd etib o‘tilgan noqonuniy holatlar bo‘yicha rasmiylashtirilgan hujjatlar chora ko‘rish uchun huquqni muhofaza qilish organlariga topshirilgan.
Izoh (0)