Qashqadaryo viloyati hokimi Murodjon Azimov Chiroqchida ro‘y bergan IIB xodimlari va Lacetti haydovchisi voqeasiga munosabat bildirib, “IIB xodimi og‘ir, bosiq va madaniyatli bo‘lishi kerak”, deb aytdi. “Daryo” muxbirining xabar berishicha, viloyat rahbari bu haqda 29-noyabr, dushanba kuni bo‘lib o‘tgan hokimlik yig‘ilishida gapirgan.
Qayd etilishicha, Murodjon Azimov viloyat IIB Yo‘l harakati xavfsizligi boshqarmasining yangi rahbari Aziz Sadirovni mas’ullarga tanishtirib, yangi rahbarga YPX xodimlari jamoatchilik bilan ishlayotganda madaniyatli bo‘lishi lozimligini uqtirgan.
“Kecha ijtimoiy tarmoqlarda ko‘rdik. IIB xodimi qo‘lidagi tayoq bilan fuqaro avtomobilini uryapti. Bu nimasi? IIB xodimi og‘ir, bosiq va madaniyatli bo‘lishi kerak-ku. Mayli, haydovchi aybdor, lekin IIB xodimi bunday paytda aql bilan ish tutishi kerak”, — degan viloyat hokimi Chiroqchidagi voqeani tilga olarkan.
Eslatib o‘tamiz, Chirpoqchida IIB xodimlari va Lacetti haydovchisi o‘rtasidagi kelishmovchilik 27-noyabr kuni Chiroqchi tumani markazidagi tuman yo‘l harakati xavfsizligi bo‘limi ma’muriy binosi yonida sodir bo‘lgandi. 28-noyabrda esa holat aks etgan videolar ijtimoiy tarmoqlarda tarqaldi.
Unda YPX inspektori va viloyat IIBga qarashli tezkor vazifalarni bajaruvchi safarbarlik otryadi vakillari Lacetti’ning ikki yon va old tomonidan to‘sib turgani, so‘ng mashina ular ustiga haydab, ketib qolgani aks etgan. Shuningdek, Lacetti joyidan qo‘zg‘alganida maxsus otryad xodimlari uni dubinka bilan urganini, oqibatda avtomobilning orqa oynasi singanini ko‘rish mumkin.
Voqeadan bir kun o‘tib mazkur haydovchi ushlandi va unga nisbatan jinoyat ishi qo‘zg‘atildi, avtomobili esa vaqtincha saqlash uchun jarima maydoniga joylashtirildi.
Izoh (0)