Самарқанд вилоятидаги газ заправка 5,4 миллиард сўмлик газдан ноқонуний фойдалангани аниқланди. Бу ҳақда Энергетика вазирлиги матбуот хизмати хабар берди.
Қайд этилишича, Энергетика вазирлиги, «Ўзнефтгазинспекция» ва «Ҳудудгаз Самарқанд» газ таъминоти филиали ходимлари билан ҳамкорликда Самарқанд вилоятида ўтказилган тадбир давомида Нарпай тумани, «Тепа» МФЙ ҳудудида фаолият юритаётган автомобилларга газ тўлдириш компрессор шохобчасининг табиий газдан фойдаланиш ҳолати назорат қилинган.
Ўтказилган назорат тадбирида газ ҳисоблаш ускунасидан ташқари, АГТКШ ҳудудидан ўтувчи «Оромгоҳ» кичик саноат зонасини табиий газ билан таъминловчи кесими 159 миллиметрли газ тармоғига яширинча ўзбошимчалик билан уланиб, табиий газдан фойдаланаётгани маълум бўлган.
Қайд этилишича, ушбу ноқонуний ҳолат бўйича дастлабки ҳисобланган газ ҳажми 5 миллион 424 минг метр кубни ва етказилган зарар миқдори 5 миллиард 424 миллион сўмни ташкил этган. Мазкур ҳажмдаги табиий газ 300 минг хонадоннинг бир кунлик истеъмолига тенг.
Юқорида қайд этиб ўтилган ноқонуний ҳолатлар бўйича расмийлаштирилган ҳужжатлар чора кўриш учун ҳуқуқни муҳофаза қилиш органларига топширилган.
Изоҳ (0)