Samarqand tumanida 44 yoshli ayolni fohishalik uchun Turkiyaga yubormoqchi bo‘lgan shaxs ushlandi. Bu haqda “Zamon” informatsion dasturida ma’lum qilindi.
Ta’kidlanishicha, tumanda Samarqand viloyati Ichki ishlar boshqarmasi, Davlat xavfsizlik xizmati va departamentning tuman bo‘limi xodimlari tomonidan odam savdosiga qarshi kurashish bo‘yicha tezkor tadbir o‘tkazilgan. Unda Samarqand tumanida yashovchi 32 yoshli erkak 44 yoshli ayolni Turkiyaga fohishalik qilish uchun yubormoqchi bo‘lgani aniqlangan.
Ma’lum bo‘lishicha, u buning evaziga 1,5 ming dollar olgan vaqtida daliliy ashyolar bilan qo‘lga olingan. Holat yuzasidan tegishli tartibda hujjatlar rasmiylashtirilgan.
Bundan avval O‘zbekistonda odam savdosi bilan shug‘ullanuvchi shaxslarning ro‘yxati yuritilishi, Toshkentda yangi tug‘ilgan chaqaloqni 8500 dollarga sotmoqchi bo‘lgan ona-bola 3 yarim yilga qamalgani hamda Navoiyda 16 yoshli qizni jinsiy qullikda saqlagan ayol qo‘lga olingani haqida xabar berilgandi.
Izoh (0)