Қашқадарё вилоятининг Қарши туманида вилоятнинг биринчи тадбиркор аёли — Назира Шодмонова томонидан қуриб битказилган масжид 14 йилдан бери ҳувуллаб ётгани, қишлоқ аҳли эса қишлоқдан 10-15 километр узоқликда жойлашган шаҳардаги масжидларга қатнаб, намозини адо этаётгани хабар берилганди.
«Дарё» мухбирининг Қашқадарё вилояти ҳокимлиги масъул ходими Абдувафо Тиловатовга таяниб хабар беришича, масжид фаолиятига рухсат берилмаётгани ҳақидаги мақоладан сўнг, вилоят ҳокимлиги масъуллари масжидни яна бир бориб кўрган.
«Масжидни бориб кўрдик ва муаммо йўқлиги ҳақида, фаолият бошланишига тўсиқ бўлувчи бирор бир ҳолат қолмаганини билдириб, республикага масжиднинг очилиши ҳақида таклиф бердик. Энди якуний хулосани улар айтади», — дейди масъул.
Кўчкакликлар эса масъулларнинг ваъдасига ҳамон шубҳа билан қарамоқда.
«Қашқадарёда яқинда иккита масжид фаолиятига рухсат берилди. Аммо бизнинг 14 йилдан бери ҳувуллаб ётган масжидимиз ҳамон ишламаяпти. Бу ҳақда мурожаат қилмаган жойимиз қолмади. Вилоятнинг янги раҳбари ва масъуллардан мазкур масжид тақдирига эътибор қаратиб, масжид фаолиятига рухсат берилса берилишини, рухсат берилмайдиган бўлса униям рўйи-рост айтишларини сўраган бўлардик», — дейди Рустам бобо Аҳмедов.
«Кўчкак» маҳалласида яшовчи Эргаш Инатовнинг айтишича, муаммо жамоатчиликка ошкор қилингач, тўрт кишидан иборат масъуллар масжидга келган ва масжидни қайта кўздан кечирган.
«Келишди, кўришди ва масжидимиз вилоятда шароити бўйича ягона масжид эканини, барча шарт-шароити мавжудлигини айтишди. Қўлимиздаги ҳужжатларни ҳам бирин-кетин кўздан кечиришди. Камчилик топилмади. Аммо рухсат беришга келганда эса сукут сақланмоқда», — дейди Эргаш Инатов.
Изоҳ (0)