Давлат геология қўмитаси олтин конлари бўлган иккита янги майдонни онлайн аукционга қўйди. Бу ҳақда «E-auksion»га таяниб, Spot хабар қилди.
Маълум бўлинишича, аукционга қўйилган ҳудудлардан бири Булуткан бўлиб, Навоий вилояти Учқудуқ туманида жойлашган. Олтин қазиб олиш лицензиясининг бошланғич нархи 189,3 миллион сўмни ташкил этади.
Аукцион 28 декабрь куни бўлиб ўтади, аризалар 26 декабрга қадар қабул қилинади. Аукцион ғолиблари 3 йил муддатга омонатдан фойдаланиш ҳуқуқи ва тегишли лицензияга эга бўлади.
Қайд этилишича, иккинчи ҳудуд Навоий вилоятининг Томди туманидаги 1451 гектар майдонда жойлашган Кинир ҳисобланади. Геологик рухсатноманинг бошланғич нархи — 223 миллион сўм. Тендер савдолари 23 декабрга белгиланган, аризалар 21 декабрга қадар қабул қилинади.
Аукционда иштирок этиш учун электрон аукционга ариза топшириш ва участканинг баҳоланган қийматининг 5 фоизи миқдорида гаров тўлаш талаб этилади.
Аввалроқ Тошкент вилояти Оҳангарон туманида жойлашган, умумий майдони 1,5 гектар бўлган олтин қидириш учун ер қаъри участкаси сотувга чиқарилганди. Шунингдек, Давлат активларини бошқариш агентлиги томонидан Навоий вилоятида қимматбаҳо металларга эга 5 та ер участкаси аукцион савдоларига қўйилган.
Изоҳ (0)