O‘zbekistonda 2021-yil 1-oktabr holatiga ko‘ra faqatgina Sirdaryo viloyatining doimiy aholisi soni bir milliondan kam. Bu haqda Statistika qo‘mitasi xabar qildi.
Ma’lum qilinishicha, Sirdaryo viloyatining doimiy aholisi soni 873,8 ming kishiga yetgan. Shundan ayollar 435 ming kishini, erkaklar 438,8 ming kishini tashkil etadi.
Avvalroq Davlat statistika qo‘mitasi doimiy aholining yosh tarkibi bo‘yicha taqsimlanishi haqida ma’lumot bergandi. Unga ko‘ra, 4 yoshgacha bo‘lganlar aholi sonida eng katta ulushni tashkil etgan.
Qo‘mita ma’lumotlariga ko‘ra, mamlakatda aholi soni har kuni o‘rtacha qariyb 2 ming kishiga oshmoqda. 2021-yilning 1-oktabrida O‘zbekiston doimiy aholisi soni 35 million 79 ming 200 kishiga yetdi. Shundan 17 432 730 nafarini ayollar, 17 646 460 nafarini erkaklar tashkil qildi. Ya’ni erkaklar soni ayollarga qaraganda 213 730 nafarga ko‘p.
Eslatib o‘tamiz, O‘zbekistonda eng ko‘p doimiy aholiga ega viloyat Samarqand hisoblanadi. Viloyatda 4 million 8 ming 843 kishi istiqomat qiladi.
Izoh (0)