Осиё тараққиёт банки Тошкент вилоятида оқава сувларнинг интеграциялашган бошқарув тизимини ривожлантиришга кўмаклашиш учун 161 миллион доллар миқдорида кредит ажратишни маъқуллади. Бу ҳақда ОТБ ахборот хизматига таяниб, Spot хабар берди.
Маълум қилинишича, лойиҳа доирасида Оҳангарон, Олмалиқ, Ангрен, Бекобод, Чирчиқ, Янгийўл ва Чиноздаги марказлашган оқава сув тизимлари модернизация қилинади. Лойиҳа доирасида тозалаш иншоотлари ва канализация тармоқларини қуриш ҳамда реконструкция қилиш, 800 мингдан ортиқ аҳоли учун сув ҳисоблагичларини ўрнатиш ишлари қўллаб-қувватланади.
Шунингдек, Чиноз, Янгийўл ва Зангиота туманларидаги 70 та аҳоли пунктида 136 минг аҳолига септиклар ўрнатилиб, марказлаштирилмаган канализация тизимидан фойдаланиши таъминланади.
«Ушбу лойиҳа сув ва канализация бошқаруви учун сунъий интеллект, масофавий датчиклар каби рақамли технологияларни ўз ичига олган ақлли ечимларни намойиш этади», — дейди ОТБнинг шаҳарсозлик бўйича катта мутахассиси Чон Хо Ким.
Бундан ташқари, банк институционал ислоҳотларни амалга ошириш учун 800 минг доллар миқдорида техник ёрдам гранти ажратади.
Эслатиб ўтамиз, аввалроқ ОТБ Ўзбекистонда молиявий бозорларни ривожлантириш учун 100 миллион доллар ажратиши ва STEM таълимини ривожлантиришга 100 миллион доллар бериши хабар қилинганди.
Изоҳ (0)