AOKAda 27-noyabr kuni Xalq ta’limi vazirligi axborot xizmati rahbari Laylo Rustamova ishtirokida O‘zbekistonda maktablar yetishmovchiligi mavzusida brifing bo‘lib o‘tdi. Bu haqda “Rasmiy xabarlar” xabar qildi.
Ma’lum qilinishicha, 2018—2021-yillarda O‘zbekiston maktablarida qo‘shimcha 474,5 ming o‘quvchi o‘rni yaratilgan. Bu uchun davlat budjetidan 5 trillion so‘mdan ortiq mablag‘ ajratilgan. Bundan tashqari, maktablar 11 yillik ta’lim tizimiga o‘tishi munosabati bilan bo‘shab qolgan 383 ta kasb-hunar kolleji maktablarga aylantirilib, 221 ming qo‘shimcha o‘quvchi o‘rni yuzaga kelgan.
Qayd etilishicha, 2022-yilda respublika bo‘yicha 15 176 o‘quvchi o‘rniga mo‘ljallangan 37 ta maktabni yangidan qurish, 71 819 o‘quvchi o‘rniga mo‘ljallangan 180 ta maktabni rekonstruksiya qilish va mavjud 89 tasini mukammal ta’mirlash belgilangan.
Ta’kidlanishicha, O‘zbekistonda 5 milliondan ortiq o‘quvchi o‘rniga mo‘ljallangan 10 130 ta maktabda 6 million 246 mingdan ortiq o‘quvchi ta’lim olmoqda. Xalq ta’limi vazirligi prognozlariga ko‘ra, keyingi 5 yilda maktab o‘quvchilarining kutilayotgan soni 7,5 millionga yetishi kutilmoqda.
Sobiq xalq ta’limi vaziri Sherzod Shermatov 4-may kuni Oliy Majlis Qonunchilik palatasi yig‘ilishida O‘zbekistondagi maktablarda sinflarning to‘laligi va darslar ikki smenada olib borilayotgani sabablarini sanab o‘tgandi. Uning so‘zlariga ko‘ra, bugungi kunda mamlakatda o‘quvchilar soni maktablar loyihaviy quvvatidan sezilarli darajada oshib ketgan. “O‘quvchi soni bilan o‘quvchi o‘rni o‘rtasidagi farq hozir bir million bo‘lsa, 2025-yilga kelib 2 millionga chiqishi mumkin. Bu degani, maktablar sig‘imidagi holat juda qiyin ahvolga tushib qolishi mumkin”, — degan edi Sherzod Shermatov.
Izoh (0)