“Kalmar o‘yini” seriali Netflix rekordchisiga aylandi

Netflix striming servisi rejissor Xvan Don-Xyokning “Kalmar o‘yini” serialini platforma tarixidagi eng muvaffaqiyatli loyiha deb atadi, deb xabar beradi “Korrespondent.net”.

Butun dunyoda shov-shuvga sabab bo‘lgan drama tomosha qilishlar bo‘yicha mutlaq rekordni o‘rnatgan — 17 kun ichida (17-sentabrdan boshlab) uni servisning 111 million obunachisi tomosha qilgan.

Shuningdek, “Kalmar o‘yini” platformadagi premyerasining dastlabki 28 kunida tomosha qilishlar bo‘yicha 100 millionlik marrani bosib o‘tgan birinchi shouga aylangan. Bundan oldingi rekord “Brijertonlar” serialiga tegishli edi — 82 million marta ko‘rilgan.

Ma’lumot uchun, Janubiy Koreyaning “Kalmar o‘yini” seriali striming platformada 17-sentabr kuni start olgan va o‘shandan buyon dunyoning 90 davlatida eng mashhur loyihalar ro‘yxatiga yetakchilik qilmoqda.

Avvalroq Netflix “Kalmar o‘yini” serialida ko‘rsatilgan telefon raqamni o‘zgartirishi, uning haqiqiy egasiga har kuni minglab qo‘ng‘iroqlar bo‘layotgani, Janubiy Koreya provayderi “Kalmar o‘yini” sabab tomoshabinlar oqimi ortgani uchun Netflix’ni sudga bergani to‘g‘risida xabar berilgandi.