Shveysariyaning Lozanna shahrida 27-noyabr kuni Xalqaro qilichbozlik federatsiyasining (FIE) hisobot-saylov Kongressi bo‘lib o‘tdi.
Kongress kun tartibidagi asosiy masala tashkilotga yangi Olimpiada sikli uchun rahbar saylash edi. Unda amaldagi prezident Alisher Usmonov g‘alaba qozonib, tashkilotdagi boshqaruvini davom ettiradigan bo‘ldi, deb yozmoqda MOQ matbuot xizmati.
Qayd etilishicha, mazkur tadbirga rasmiy mehmon sifatida Xalqaro olimpiya qo‘mitasi prezidenti Tomas Bax ham tashrif buyurgan, u Alisher Usmonovni saylovdagi g‘alabasi bilan tabriklagan.
Ma’lumot uchun, asli kelib chiqishi o‘zbekistonlik bo‘lgan Alisher Usmonov 2008-yildan beri ushbu xalqaro tashkilotni boshqarib kelmoqda. U FIEga 2012 va 2016-yillarda qayta saylangan.
Shuningdek, saylov yakunlariga ko‘ra o‘zbekistonliklar ham tashkilotning bir qator bo‘limlari tarkibiy qismiga kirdi. Jumladan, O‘zbekiston qilichbozlik federatsiyasi Bosh kotibi Gulnora Saidova targ‘ibot qo‘mitasi, Tokio—2020 Olimpiadasida referilik qilgan Aida Hasanova esa hakamlar qo‘mitasi tarkibiga kiritildi.
Izoh (0)