Shavkat Mirziyoyev 25-noyabr kuni Pokiston Bosh vaziri Imron Xon bilan telefon orqali muloqot qildi. Bu haqda Prezident matbuot xizmati xabar qildi.
Qayd etilishicha, davlat rahbari Imron Xonni tavallud kuni bilan qutlab, unga sog‘lik, farovonlik va katta muvaffaqiyatlar, Pokiston xalqiga esa tinchlik-osoyishtalik va ravnaq tilagan. Suhbat chog‘ida oliy darajada erishilgan kelishuvlarni amalga oshirish masalalari hamda mamlakatlar o‘rtasidagi o‘zaro manfaatli hamkorlikni kengaytirish istiqbollari ko‘rib chiqilgan.
Muloqot paytida aloqalar faollashgani, ikki tomonlama tovar ayirboshlash ko‘rsatkichlari sezilarli darajada o‘sgani va ishbilarmonlar o‘rtasidagi kooperatsiya kuchaygani qayd etilgan. Qishloq xo‘jaligi mashinasozligi, farmatsevtika va kimyo sanoati, to‘qimachilik va qurilish materiallari tarmoqlari, boshqa sohalardagi investitsiya loyihalarini ilgari surishga alohida e’tibor qaratilgan.
Ta’kidlanishicha, yetakchilar mintaqada yirik infratuzilma loyihalarini amalga oshirish masalalarini muhokama qilib, bo‘lajak uchrashuvlar rejasini ham ko‘rib chiqqan.
Izoh (0)