O‘zbekistonda o‘rtacha pensiya miqdori qancha?

O‘zbekistonda 1991—2021-yillar davomida Prezident farmonlariga asosan pensiyalar miqdori 67 marotaba oshirilgan. Bu haqda Moliya vazirligi huzuridagi Budjetdan tashqari pensiya jamg‘armasi matbuot xizmati xabar berdi.

Pensiya jamg‘armasi tizimida hisobga olingan pensiya oluvchilarning 2016-yil 1-yanvar holatiga respublika bo‘yicha bir oylik o‘rtacha pensiya miqdori 421 629 so‘m bo‘lgan bo‘lsa, 2021-yil sentabr oyida 924 780 so‘mga yetgan. Ya’ni o‘tgan davrda O‘zbekiston Prezidentining farmonlariga asosan pensiyalar miqdori 2,2 baravarga oshirilgan.

Shundan, 2021-yil sentabr holatiga ko‘ra bir oylik o‘rtacha pensiya miqdori:

• Toshkent shahrida — 1 250 992 so‘m;
• Navoiy viloyatida — 1 176 323 so‘m;
• Toshkent viloyatda — 1 012 617 so‘m;
• Buxoro viloyatida — 941 411 so‘m;
• Sirdaryo viloyatida — 936 392 so‘m;
• Qoraqalpog‘iston Respublikasida — 918 930 so‘m;
• Samarqand viloyatida — 902 172 so‘m;
• Qashqadaryo viloyatida — 876 728 so‘m;
• Xorazm viloyatida — 870 800 so‘m;
• Surxondaryo viloyatida — 850 685 so‘m;
• Jizzax viloyatida — 848 930 so‘m;
• Farg‘ona viloyatida — 836 856 so‘m;
• Namangan viloyatida — 802 125 so‘m;
• Andijon viloyatida — 801 640 so‘m.

Shuningdek, 2021-yil 1-oktabr holatiga ko‘ra, respublika bo‘yicha pensiya oluvchilarning umumiy soni 3 548 093 nafarni tashkil etmoqda (umumiy aholi sonidagi ulushi 10,2 foiz). Bu 1991-yil 1-yanvar holatiga nisbatan 1 389 098 nafarga yoki 64,3 foizga ko‘p demak. Mamlakatda pensiya oluvchilarning umumiy soni bo‘yicha eng yuqori ko‘rsatkich Farg‘ona viloyatiga tegishli bo‘lsa (462 204 nafar), Sirdaryo viloyatida eng kam — 103 140 nafar.

Mavzuga doir: O‘zbekistonda 2022-yil 1-iyuldan boshlab davlat pensiyalarini tayinlashda fuqarolardan qator hujjatlarni talab qilish bekor qilinadi

Eslatib o‘tamiz, Prezident farmoni bilan 1-sentabrdan boshlab budjet tashkilotlari xodimlarining ish haqi, pensiya, stipendiya va nafaqalar miqdori 1,1 barobarga oshirildi. Farmonga ko‘ra, pensiyani hisoblashning bazaviy miqdori — oyiga 289 000 so‘m, yoshga doir eng kam pensiyalar — oyiga 565 000 so‘m, bolalikdan nogironligi bo‘lgan shaxslarga beriladigan nafaqa — oyiga 622 000 so‘m etib belgilangan.