“O‘zbekiston Respublikasida korrupsiyaga qarshi kurashish tizimini takomillashtirilishi munosabati bilan O‘zbekiston Respublikasining ayrim qonun hujjatlariga o‘zgartish va qo‘shimchalar kiritish to‘g‘risida”gi qonun 19-noyabrdan kuchga kirdi, deb xabar beradi O‘zA.
Qonun bilan Jinoyat-ijroiya kodeksi, “Jinoyat ishini yuritish chog‘ida qamoqda saqlash to‘g‘risida” hamda “Ma’muriy qamoqni o‘tash tartibi to‘g‘risida”gi qonunlarga qo‘shimcha kiritilgan.
Endilikda qonun bilan Korrupsiyaga qarshi kurashish agentligi xodimlari korrupsiyaviy huquqbuzarliklar sodir etilishini o‘rganish va tahlil qilish uchun jazoni ijro etish muassasalariga moneliksiz kirish, hujjatlar bilan tanishish huquqiga ega bo‘lgan.
Shuningdek, Oliy Majlis Qonunchilik palatasi va Senatining reglamentlari to‘g‘risidagi hamda “Parlament nazorati to‘g‘risida”gi qonunlarda Qonunchilik palatasi va Senatning Korrupsiyaga qarshi kurashish agentligi tomonidan tayyorlanadigan O‘zbekistonda korrupsiyaga qarshi kurashish to‘g‘risida milliy ma’ruzasini ko‘rib chiqish tartibi belgilandi.
Unga ko‘ra, Qonunchilik palatasi va Senat Milliy ma’ruzani dastlabki tarzda ko‘rib chiqib, fikr va takliflar ishlab chiqadi. Palata majlislarida majburiy ravishda har tomonlama muhokama qiladi. Parlament palatalarining Milliy ma’ruzani ko‘rib chiqish bo‘yicha qabul qilgan qarorlari agentlikka yuboriladi.
BMTning Korrupsiyaga qarshi konvensiyasiga O‘zbekistonning qo‘shilishi to‘g‘risidagi qonunda korrupsiyaning oldini olish bo‘yicha aniq chora-tadbirlar ishlab chiqish va ularni amalga oshirishda boshqa davlatlarga yordam ko‘rsatadigan organlar qatoriga Korrupsiyaga qarshi kurashish agentligi ham kiritilgan.
“Korrupsiyaga qarshi kurashish to‘g‘risida”gi va “Prokuratura to‘g‘risida”gi qonunlarga kiritilgan o‘zgartish va qo‘shimchalarga binoan Korrupsiyaga qarshi kurashish agentligi korrupsiyaga qarshi kurashish bo‘yicha faoliyatni amalga oshiruvchi davlat organlari qatoriga kiritilgan.
Korrupsiyaga qarshi kurashish bo‘yicha respublika idoralararo komissiyasi O‘zbekiston korrupsiyaga qarshi kurashish milliy kengashi etib qayta tashkil etilishi munosabati bilan qonunchilikka tegishli normalar kiritilgan.
“Huquqbuzarliklar profilaktikasi to‘g‘risida”gi qonunda Korrupsiyaga qarshi kurashish agentligi huquqbuzarliklar profilaktikasini bevosita amalga oshiruvchi organlar ro‘yxatiga kiritilgan va uning shu sohadagi vakolatlari belgilangan.
Endilikda korrupsiyaga oid huquqbuzarliklar to‘g‘risida axborot berayotgan shaxslar va ularning qarindoshlari davlat himoyasida bo‘ladi.
Bunday shaxslarning hayoti va sog‘ligiga haqiqiy tahdidni, ularga nisbatan zo‘rlik ishlatilganini, mol-mulki yo‘q qilingani yoki shikastlantirilganini tasdiqlovchi yetarli asoslar mavjud bo‘lgan taqdirda korrupsiyaga qarshi kurashishni amalga oshiruvchi organlar “Jabrlanuvchilarni, guvohlarni va jinoyat protsessining boshqa ishtirokchilarini himoya qilish to‘g‘risida”gi qonunga muvofiq, ularni himoya qilish bo‘yicha zarur choralar ko‘rishi shart.
Avvalroq O‘zbekistonda o‘zaro qarindoshlarning davlat korxonasida biri ikkinchisiga bo‘ysunib ishlashi taqiqlanishi mumkinligi, O‘zbekistonda oliy ta’lim va qurilishni korrupsiyasiz sohaga aylantirish bo‘yicha “yo‘l xaritasi” ishlab chiqilishi to‘g‘risida xabar berilgandi.
Izoh (0)