Ўзбекистонда октябрь энг кам бензин ишлаб чиқарилган ойлардан бири бўлди

Ўзбекистонда 2021 йилнинг январь—октябрь ойларида 902,7 минг тонна автомобиль бензини ишлаб чиқарилди. Бу ҳақда Статистика қўмитаси хабар қилди.

Маълум бўлишича, бензин ишлаб чиқариш ҳажми ойлар кесимида қуйидагича:

• январь – 93,9 минг тонна;
• февраль – 91,4 минг тонна;
• март – 106 минг тонна;
• апрель – 77,3 минг тонна;
• май – 87,6 минг тонна;
• июнь – 90,3 минг тонна;
• июль – 85,7 минг тонна;
• август – 97,2 минг тонна;
• сентябрь – 85,9 минг тонна;
• октябрь – 87,5 минг тонна.

Шунингдек, Ўзбекистонда бензин импорт қилиш ҳажми 3,2 баробарга ошиб, 2021 йилнинг тўққиз ойи давомида 104 миллион долларлик бензин импорт қилинган.

Республика товар-хом ашё биржаси Ўзбекистонда 2021 йил бошидан буён автомобиль бензини сегментида нархларнинг ўсишига оид маълумотларини эълон қилганди. Унга кўра, Аи-80 бензини нархи ўртача 63,2 фоизга ўсган. Кейинчалик Ўзбекистонда 2022 йилдан бошлаб Аи-80 бензинидан босқичма-босқич воз кечиш режалаштирилаётгани хабар қилинди. Ноябрь ойининг иккинчи ярмига келиб биржа савдоларида Аи-80 маркали бензин нархи тушишни бошлади. 15 ноябрга нисбатан 17 ноябрь куни Аи-80 маркали автомобиль бензинининг ўртача сотилиш нархлари 1 тоннаси 10 миллион 129 минг сўмдан 9 миллион 365 минг 500 сўмгача, 18 ноябрь куни эса 9 миллион 180 минг 500 сўмга пасайиб 9 фоизга арзонлашган.

Бундан ташқари, Ижтимоий тармоқларда Ўзбекистонда Аи-91 бензинининг нархи қимматлашгани ва сифати пастлиги ҳақида турли хабарлар пайдо бўла бошлади. Энергетика вазирлиги 1 литр Аи-91 бензини нархи 8100 сўмга чиққанига муносабат билдириб, мамлакатдаги бензин нархи бозор иқтисодиёти тамойиллари ҳамда жаҳон котировкаларига боғланганини маълум қилган. Шунингдек, журналист ва блогерлар Тошкент шаҳридаги турли АЁҚШларда сотилаётган бензин сифати ва нархи бўйича жамоатчилик назоратини олиб борган.