O‘zbekistonda so‘nggi kunlarda sodir bo‘lgan YTHlar oqibatida 5 kishi vafot etdi. YTH tafsilotlari

So‘nggi kunlarda xabar qilingan O‘zbekistonda sodir bo‘lgan 5 ta yo‘l-transport hodisasi oqibatida 5 kishi vafot etdi, 4 kishi jarohatlandi. Quyida ushbu YTH tafsilotlarini taqdim etamiz.

Navoiyda Nexia 13 yoshli velosipedchining hayotiga zomin bo‘ldi.

Navoiy viloyati Xatirchi tumanidan o‘tgan 4R-48 avtomobil yo‘lining 133-kilometrida Yangirobot–Zarafshon yo‘nalishida harakatlanib kelayotgan Nexia avtomashinasi yo‘lni kesib o‘tayotgan velosipedchini urib yuborgan.

Oqibatda 13 yoshli velosipedchi halok bo‘lgan.

Holat yuzasidan 29 yoshli haydovchiga nisbatan Xatirchi tumani IIB TB tomonidan Jinoyat kodeksining tegishli bandlari bilan jinoyat ishi qo‘zg‘atilgan.

Namanganda Matiz temir to‘siqqa urilishi oqibatida haydovchi ayol vafot etdi.

2021-yil 10-noyabr kuni soat 19:00 larda, Pungon–Namangan yo‘lining 68 kilometrida, “Porosmon” MFY hududida, Namangan shahar Davlatobod tumanida yashagan, 1986-yilda tug‘ilgan ayol Matiz avtomashinasini boshqarib borayotib, harakat xavfsizligini ta’minlay olmay, boshqaruvni yo‘qotib, yo‘lning o‘rtasini ajratib turuvchi temir to‘siqqa urilgan.

Oqibatda haydovchi tan jarohati olib, voqea joyida vafot etgan va avtomashinada bo‘lgan yo‘lovchi, Yangiqo‘rg‘on tumanida yashovchi, 1999-yilda tug‘ilgan fuqaro bosh miya asosining sinishi, chap chakka suyagining ochiq sinishi tashxisi bilan tan jarohati olib, shifoxonaga yotqizilgan.

Ushbu holat bo‘yicha To‘raqo‘rg‘on tuman IIB huzuridagi TB tomonidan 2021-yil 10-noyabr kuni Jinoyat kodeksining 266-moddasi 2-qismi (odam o‘limiga sabab bo‘lgan transport boshqarish xavfsizligi qoidalarini buzish) bilan jinoyat ishi qo‘zg‘atilgan.

Termizda Labo beton ustunga urildi.

2021-yil 13-noyabrdan 14-noyabrga o‘tar kechasi 02:30 larda Termiz shahri Barkamol avlod va Ko‘zmunchoq ko‘chasi kesishgan chorrahada Labo rusumli avtomashina boshqaruvni yo‘qotib, yo‘l o‘rtasidagi beton ustunga urilgan.

Oqibatda haydovchi olgan tan jarohatlari sababli shifoxonada vafot etgan.

Labo va Nexia to‘qnashuvida 1 kishi vafot etdi 3 kishi jarohatlandi

2021-yil 12-noyabr kuni soat 10:00 larda, Jomashuy–Tegirmon–Navbahor yo‘lining 38 kilometrida, Pop tumani “Navbahor” MFY hududida, Mingbuloq tumanida yashovchi, 1992-yilda tug‘ilgan fuqaro Nexia avtomashinasini boshqarib borayotib, harakat xavfsizligini ta’minlay olmay, qarama-qarshi yo‘nalishda harakatlanib kelayotgan, Farg‘ona viloyati Uchko‘prik tumanida yashovchi, 1962-yilda tug‘ilgan fuqaro boshqaruvidagi Labo avtomashinasi bilan to‘qnashgan.

Oqibatda Labo avtomashinasi haydovchisi olgan og‘ir tan jarohati oqibatida shifoxonada vafot etgan hamda Nexia avtomashinasida bo‘lgan 3 nafar yo‘lovchilar turli jarohat bilan shifoxonaga yotqizilgan.

Ushbu holat bo‘yicha tuman IIB huzuridagi TB tomonidan Jinoyat kodeksining 266-moddasi 2-qismi bilan jinoyat ishi qo‘zg‘atilgan.

To‘raqo‘rg‘onda Damas velosipedchining o‘limiga sababchi bo‘ldi.

2021-yil 12-noyabr kuni soat 16:45 larda, Kosonsoy–To‘raqo‘rg‘on–Mingbuloq yo‘lining 54-kilometrida, To‘raqo‘rg‘on tumani “Obodon” MFY hududida, shu tumanda yashovchi, 1986-yilda tug‘ilgan fuqaro Damas avtomashinasini boshqarib borayotib, harakat xavfsizligini ta’minlay olmay, yo‘lni kesib o‘tayotgan velosipedchi To‘raqo‘rg‘on tumanida yashagan, 1955-yilda tug‘ilgan fuqaroni urib yuborgan.

Oqibatda velosipedchi olgan tan jarohati oqibatida voqea joyida vafot etgan.

Ushbu holat bo‘yicha tuman IIB huzuridagi TB tomonidan Jinoyat kodeksining 266-moddasi 2-qismi bilan jinoyat ishi qo‘zg‘atilgan.