Belarus prezidenti Aleksandr Lukashenko Germaniya kansleri Angela Merkel bilan telefon suhbati chog‘ida qochqinlarning katta qismini o‘z vataniga qaytarishga ko‘maklashishga va’da berdi. Biroq buning uchun Yevropa Ittifoqi Polsha bilan chegara yaqinidagi lagerda bo‘lib turgan 2000 kishi uchun gumanitar yo‘lak ochishi kerak, deya xabar berdi “Kommersant” Belarus prezidenti matbuot kotibi Natalya Eysmontga tayanib.
Angela Merkel go‘yoki, Germaniya uchun bunday yo‘lak ochish bo‘yicha Yevropa Ittifoqi rasmiylari bilan muzokara olib borishga va’da bergan. Eysmontning so‘zlariga ko‘ra, Lukashenko taklif qilgan mexanizmga muvofiq holda Yevropa Ittifoqi lagerdagi 2000 qochqin uchun gumanitar yo‘lak yaratmoqda. “Qolgan 5 ming kishini o‘z vatanlariga qaytarishga (imkon qadar va agar ular xohlasa) yordam berish majburiyatini olamiz. Angela Merkel esa kelishuvlarga ko‘ra, Yevropa Ittifoqi bilan, jumladan, Germaniyga gumanitar yo‘lak tashkil etish bo‘yicha muzokaralar olib boradi”, — deya qo‘shimcha qildi u.
Uning ta’kidlashicha, Minsk o‘z majburiyatlarini oxirigacha bajaradi. “Ha, afsuski, faqat 400 ga yaqin qochqin o‘z vataniga qaytishga rozi bo‘ldi. Aniqroq aytganda, bugun uchib ketgan samolyotda 374 nafar yo‘lovchi bor edi, ularning aksariyati Iroq fuqarolari”, — dedi Eysmont xonim.
“Umumiy hisobda, bugun respublika hududida 7 mingga yaqin qochqin bor. Ulardan 2 mingga yaqini chegaradagi muhojirlar lagerida. Mavjud ma’lumotlarga ko‘ra, yana 200 dan 500 nafargacha bo‘lgan kishilar ham chegarada, lekin ular boshqa nuqtalarda. Bu qochqinlar allaqachon Polshaga kirib borgan, polshaliklar esa ularni kuch bilan haydab chiqarishga uringan”, — dedi Natalya Eysmont.Uning so‘zlariga ko‘ra, Belarusdagi qolgan qochqinlar Yevropa Ittifoqidan, birinchi navbatda, Germaniyadan boshpana berilishini talab qilmoqda. Eysmont, shuningdek, Yevropa Ittifoqi muhojirlar bilan inqirozni hal qilish bo‘yicha kelishuvni bajarmayotganini ta’kidladi. “Biz o‘z va’dalarimizga vafo qilyapmiz, biroq Yevropa Ittifoqi tomonidan birorta ham majburiyat bajarilmagan”, — dedi u. Xususan, Yevropa Ittifoqi Lukashenko va Merkel telefon suhbatida kelishib olgan ekspertlar darajasidagi muzokaralarni hali ham boshlamagan.
17-noyabr kuni Aleksandr Lukashenko va Angela Merkel migratsiya inqirozi yuzasidan bir hafta ichida ikkinchi marta telefon orqali muloqot qilgan. Minsk tomonlar muammoni Belarus va Yevropa Ittifoqi darajasida hal qilishga kelishib olganini da’vo qilmoqda. Berlin xabariga ko‘ra, Germaniya kansleri vazifasini bajaruvchi Merkel muhojirlarga gumanitar yordam ko‘rsatish tarafdori ekanini aytgan.
18-noyabr kuni Yevropa Ittifoqi Polsha va boshqa davlatlar bilan chegaradagi muhojirlar oqimiga oid vaziyat yuzasidan Belarus bilan keng ko‘lamli muzokaralar o‘tkazish imkoniyatini istisno qildi.
“Lukashenko rejimi bilan muzokaralar masalasi kun tartibida yo‘q”, — dedi Yevropa komissiyasi vakili Erik Mamer brifingda. Uning so‘zlariga ko‘ra, Bryusselning e’tibori hozir Minsk bilan bunday aloqalarga emas, muhojirlarga yordam berish va ularni uylariga olib ketishga qaratilgan.
Shu bilan birga, Mamer Belarus tomoni bilan aloqalar o‘rnatish ehtimoli mavjudligi, ammo faqat bu texnik masalalarda bo‘lishini aytdi. “Biz Birlashgan Millatlar Tashkiloti tuzilmalari, xususan, BMTning Qochqinlar bo‘yicha agentligi, Xalqaro migratsiya tashkiloti va Belarus tomoni bilan chegaradagi odamlarni vataniga qaytarishga yordam berish bo‘yicha texnik muzokaralar olib boramiz. Bu muzokaralardagi asosiy mavzu bo‘ladi, shuningdek, albatta, chegaradagi odamlarga yordam ko‘rsatishni osonlashtiradi”, — deya qo‘shimcha qildi Ittifoq vakili.
Mavzuga doir:
- Lukashenko chegaradagi migrantlar uchun boshpana tashkillashtirish bo‘yicha topshiriq berdi. Ular logistika markaziga joylashtirilgan (foto)
- Migratsiya inqirozida Lukashenkoning aybi yo‘q. Ammo u Yevropaga ketadigan Rossiya gazini uzib qo‘ymasligi kerak. Putin haftaning eng muhim mavzusi haqida fikr bildirdi
- Yevropada qochoqlar bilan bog‘liq vaziyat uchinchi jahon urushiga olib kelishi mumkinligi aytilmoqda
Izoh (0)