Ukraina prezidenti Vladimir Zelenskiy Ukraina Milliy xavfsizlik va mudofaa kengashining 2021-yil 20-avgustdagi Rossiya Federatsiyasi razvedka va maxsus xizmatlarining 28 nafar xodimiga nisbatan sanksiyalar qo‘llash to‘g‘risidagi qarorini kuchga kiritish to‘g‘risidagi farmonni imzoladi. Bu haqda “Interfaks” xabar berdi.
Xabarga ko‘ra, tegishli 584/2021-sonli hujjat davlat rahbarining veb-saytida e’lon qilingan va u e’lon qilingan kundan e’tiboran kuchga kiradi.
Sanksiyalar ushbu shaxslarning Ukrainadagi aktivlarini muzlatish, savdo operatsiyalarini cheklash, Ukraina hududi orqali resurslar tranziti, parvozlar va tashishlarni cheklash, qisman yoki to‘liq to‘xtatish, Ukrainadan kapital olib chiqib ketishiga yo‘l qo‘ymaslik, iqtisodiy va moliyaviy majburiyatlarni bajarishni to‘xtatish, litsenziyalar va boshqa ruxsatnomalarni bekor qilish yoki amal qilishini tugatish, davlat mulkini xususiylashtirish va ijaraga berishda ishtirok etishini taqiqlash kabilarni nazarda tutadi.
Bundan tashqari, cheklovlar ro‘yxatiga Ukraina suvlariga xorijiy harbiy va harbiy bo‘lmagan kemalarning kirishini taqiqlash, Ukraina milliy bankining investitsiya kiritish uchun ruxsatnomalar berishini taqiqlash, Ukrainaga chet el valyutasini olib kirish yoki olib chiqish uchun ruxsatnomalar berishni to‘xtatish, to‘lov kartalaridagi mablag‘ni naqd pulga almashtirishni cheklash, texnologiya va huquqlarni intellektual mulkka o‘tkazishni taqiqlash va Ukrainaning barcha davlat mukofotlaridan mahrum qilish kiradi.
Shuningdek, qo‘llash bo‘yicha amaldagi qonunchilikda belgilangan tamoyillariga mos keladigan boshqa sanksiyalar ham joriy qilinishi mumkin.
Rossiya Federatsiyasi razvedka va maxsus xizmatlari xodimlariga nisbatan sanksiyalar qo‘llash to‘g‘risidagi qaror 20-avgust kuni bo‘lib o‘tgan yig‘ilishda Ukraina Xavfsizlik xizmati taklifi bilan Milliy xavfsizlik va mudofaa kengashi tomonidan qabul qilingandi. Qayd etilishicha, ushbu shaxslar “Qrim va Donbassdagi bosqinchi hukumatga yordam berishda ishtirok etmoqda, shuningdek, ular bosib olingan hududlarda Rossiya hikoyalarini singdirmoqda”.
Izoh (0)