Farg‘ona davlat universiteti o‘qituvchisi birovdan olgan 57 million so‘mni totalizatorda yutqazib qo‘ygani uchun qabristonda o‘z joniga qasd qildi. Bu haqda “Daryo”ga Bosh prokuratura axborot xizmati rahbari Hayot Shamsutdinov ma’lum qildi.

17-noyabr kuni soat 16:00 lar atrofida Shahrixon tumanida yashovchi R.B. mazkur hududda joylashgan qabriston ayvonida bo‘yin sohasidan o‘zini osib, o‘z joniga qasd qilgan va voqea joyida vafot etgan.

Uning o‘limi sabablarini aniqlash yuzasidan sud-tibbiy ekspertizasi tayinlangan. Ekspertiza davomida jasadda tan jarohatlari aniqlanmagan.

Olib borilgan tezkor surishtiruv harakatlari davomida R.B. Farg‘ona davlat universitetida o‘qituvchi lavozimida ishlashi, bukmekerlik kompaniyasi orqali tavakkalchilikka asoslangan qimor o‘yinlari o‘ynab kelgani aniqlangan.

16-noyabr kuni Farg‘ona shahrida yashovchi shaxsdan mazkur qimor o‘yinlarini o‘ynash uchun 57 million so‘m qarzga olgan va totalizatorda mazkur pullarni yutqazib qo‘ygan.

Pullarni 18-noyabr kuni qaytarib berishni va’da qilgan. Shu kuni oila a’zolariga o‘z telefoni orqali uni qabristondan topishlari haqida SMS xabarnoma yuborgan. Soat 17:30 lar atrofida oila a’zolari uni o‘zi istiqomat qilib kelgan MFYdagi qabriston ayvoniga o‘zini osgan holatda topgan.

Eslatib o‘tamiz, O‘zbekistonda bukmekerlik faoliyati noqonuniy hisoblanadi. Ma’muriy javobgarlik to‘g‘risidagi kodeksning 191-moddasi (qimor va tavakkalchilikka asoslangan boshqa o‘yinlar), shuningdek, Jinoyat kodeksining 278-moddasi (qimor va tavakkalchilikka asoslangan boshqa o‘yinlarni tashkil etish hamda o‘tkazish)ga binoan bu turdagi faoliyat hali ham noqonuniy hisoblanadi.

O‘zbekistonda 10 dan ortiq bukmekerlik xizmatlarini ko‘rsatuvchi saytlarga kirish cheklangan.