Surxondaryo viloyati hokimi To‘ra Bobolov Sho‘rchi hamda Angor tumani hokimlariga intizomiy jazo qo‘lladi. Bu haqda “Daryo”ga To‘ra Bobolovning matbuot kotibi Murodbek Davlatov xabar berdi.
Qayd etilishicha, 2021-yilning 15-noyabr kuni viloyat hokimligida videoselektor tarzidagi navbatdagi hokimlik soati o‘tkazilgan.
“Yig‘ilishda O‘zbekiston Prezidentining farmonlari, qarorlari, farmoyishlari va topshiriqlari, Vazirlar Mahkamasining qarorlari va farmoyishlarida belgilangan vazifalarning o‘z vaqtida va sifatli ijro qilinish ahvoli to‘g‘risidagi masala ko‘rib chiqildi. Yig‘ilishda ba’zi tuman hokimliklari tomonidan Prezident farmonlari, qarorlari, farmoyishlari va topshiriqlari, Vazirlar Mahkamasining qarorlari va farmoyishlarida belgilangan vazifalar ijrosida sustkashlikka yo‘l qo‘yilayotganligi qayd etildi.
Xususan, “Raqamli O‘zbekiston — 2030” strategiyasi doirasida 2020-yilda Angor va Sho‘rchi tumanlarini raqamli transformatsiya qilish bo‘yicha loyihalarni amalga oshirishda xato va kamchiliklarga yo‘l qo‘yganligi aniqlanib, mazkur tuman hokimlari — Shohjahon Abdullayev hamda Baxtiyor Xudoyberganovga nisbatan Mehnat kodeksining 181-moddasi 2-qismiga asosan, o‘rtacha oylik ish haqining 10 foizi miqdorida jarima jazosi belgilandi”, — deydi Murodbek Davlatov.
Ta’kidlanishicha, yig‘ilishda shuningdek viloyatda eksport prognoz parametrlarining bajarilishi, “temir daftar” va “yoshlar daftari”ga kiritilgan fuqarolar bilan ishlash holati atroflicha tahlil qilingan.
Izoh (0)