Сурхондарё вилояти ҳокими Тўра Боболов Шўрчи ҳамда Ангор тумани ҳокимларига интизомий жазо қўллади. Бу ҳақда «Дарё»га Тўра Боболовнинг матбуот котиби Муродбек Давлатов хабар берди.
Қайд этилишича, 2021 йилнинг 15 ноябрь куни вилоят ҳокимлигида видеоселектор тарзидаги навбатдаги ҳокимлик соати ўтказилган.
«Йиғилишда Ўзбекистон Президентининг фармонлари, қарорлари, фармойишлари ва топшириқлари, Вазирлар Маҳкамасининг қарорлари ва фармойишларида белгиланган вазифаларнинг ўз вақтида ва сифатли ижро қилиниш аҳволи тўғрисидаги масала кўриб чиқилди. Йиғилишда баъзи туман ҳокимликлари томонидан Президент фармонлари, қарорлари, фармойишлари ва топшириқлари, Вазирлар Маҳкамасининг қарорлари ва фармойишларида белгиланган вазифалар ижросида сусткашликка йўл қўйилаётганлиги қайд этилди.
Хусусан, «Рақамли Ўзбекистон — 2030» стратегияси доирасида 2020 йилда Ангор ва Шўрчи туманларини рақамли трансформация қилиш бўйича лойиҳаларни амалга оширишда хато ва камчиликларга йўл қўйганлиги аниқланиб, мазкур туман ҳокимлари — Шоҳжаҳон Абдуллаев ҳамда Бахтиёр Худойбергановга нисбатан Меҳнат кодексининг 181-моддаси 2-қисмига асосан, ўртача ойлик иш ҳақининг 10 фоизи миқдорида жарима жазоси белгиланди», — дейди Муродбек Давлатов.
Таъкидланишича, йиғилишда шунингдек вилоятда экспорт прогноз параметрларининг бажарилиши, «темир дафтар» ва «ёшлар дафтари»га киритилган фуқаролар билан ишлаш ҳолати атрофлича таҳлил қилинган.
Изоҳ (0)