Oliy Majlis Senati favqulodda holat to‘g‘risidagi qonun va boshqa hujjatlarni ko‘rib chiqadi

Oliy Majlisi Senatining yigirma birinchi yalpi majlisini 18-noyabr kuni chaqiriladi. Bu haqda parlament yuqori palatasi matbuot xizmati xabar berdi.

Videokonferensaloqa tarzida o‘tkaziladigan yalpi majlisda senatorlar “Favqulodda holat to‘g‘risida”gi Konstitutsiyaviy qonun, “Gidrometeorologiya faoliyati to‘g‘risida”gi qonunni ko‘rib chiqadi.

Bundan tashqari, yalpi majlisda intellektual mulk, iste’molchilar huquqlarini himoya qilish, fuqarolik to‘g‘risidagi, og‘ir ijtimoiy ahvolda qolgan xotin-qizlar huquqlari kafolatlarini ta’minlash hamda o‘simliklar karantini va himoyasi kabi sohalarda qonunchilikka qo‘shimcha va o‘zgartishlar kiritishi masalalari ham muhokama qilinadi.

Shuningdek, “Transport va moliya sohalaridagi ayrim huquqbuzarliklarni sodir etganlik uchun ma’muriy jazolar liberallashtirilishi munosabati bilan O‘zbekiston Respublikasining Ma’muriy javobgarlik to‘g‘risidagi kodeksiga o‘zgartishlar kiritish haqida”gi qonun ham muhokama qilinadi.

Yalpi majlisda Inson huquqlari bo‘yicha O‘zbekiston milliy markazi direktorining inson huquqlari sohasidagi xalqaro majburiyatlarning bajarilishi holati haqidagi axborotini eshitish ham o‘rin olgan.

Bundan tashqari, Senatorlar aholini ichimlik suvi bilan ta’minlashdagi muammolar yuzasidan Vazirlar Mahkamasiga yuborilgan parlament so‘rovi natijalarini ko‘rib chiqadi.

Shu bilan birga, homilador va reproduktiv yoshdagi ayollar hamda go‘daklarga ko‘rsatilayotgan tibbiy yordam holati hamda yengil sanoat va charm sanoati korxonalarida xotin-qizlarning mehnat munosabatlari bilan bog‘liq masalalarda ish beruvchilarning mas’uliyatini oshirish bo‘yicha Vazirlar Mahkamasiga parlament so‘rovlari yuborish masalalari muhokama etiladi.

Fan, ta’lim va sog‘liqni saqlash masalalari qo‘mitasining 2020-yil va 2021-yilning o‘tgan davridagi faoliyati yuzasidan hisobotini ham eshitish rejalashtirilgan.

Eslatib o‘tamiz, Senatning yigirmanchi yalpi majlisi 20-oktabr kuni chaqirilgandi. Mazkur majlisda “Ijtimoiy tadbirkorlik to‘g‘risida”gi qonun muhokamasi adliya vaziri va senatorlar o‘rtasidagi debatga aylanib ketgandi. Senatorlar “Ijtimoiy tadbirkorlik to‘g‘risida”gi qonunning ba’zi normalarini qayta ko‘rib chiqish kerak deb hisoblab, uni qaytargan edi. Keyinroq Nogironlar, Karlar va Ko‘zi ojizlar jamiyatlari Senatga murojaat qildi.