Oliy Majlis Qonunchilik palatasida Xalq demokratik partiyasi fraksiyasining “Alkogol va tamaki mahsulotlarining tarqatilishi hamda iste’mol qilinishini cheklash to‘g‘risida”gi qonun loyihasi muhokamasiga oid navbatdagi yig‘ilishi bo‘lib o‘tdi. Bu haqda partiya axborot xizmati xabar qildi.
Ma’lum bo‘lishicha, ikkinchi o‘qishda ko‘rib chiqilgan qonun loyihasi qizg‘in tortishuvlar asosida muhokama qilingan. Qonun alkogol va tamaki mahsulotlarining tarqatilishini hamda iste’mol qilinishini cheklash sohasidagi munosabatlarni tartibga solish, fuqarolarning, avvalo, yigirma bir yoshga to‘lmagan shaxslarning sog‘lig‘ini alkogol va tamaki mahsulotlarini iste’mol qilishning zararli ta’siridan himoya qilish, shuningdek, jamiyatda sog‘lom turmush tarzini shakllantirish hamda qaror toptirishning tashkiliy va huquqiy shart-sharoitlarini yaratish maqsadida qabul qilinmoqda.
Ta’kidlanishicha, qonun loyihasini ishlab chiqishda bir qator xorijiy davlatlar tajribasi o‘rganilgan. Jumladan, AQSh va Qozog‘istonda 21 yoshga to‘lmaganlarga alkogol va tamaki sotish taqiqlanishi, Turkmaniston va Indoneziyada 21 yoshga to‘lmaganlarga, Hindistonning 17 ta shtatida esa 21—25 yoshga to‘lmaganlarga alkogol sotish taqiqlangani inobatga olinib, O‘zbekistonda ham bu borada yoshga doir taqiqni 21 yoshgacha oshirish taklif etilmoqda.
Qayd etilishicha, qizg‘in muhokamalardan so‘ng qonun loyihasi deputatlar tomonidan ma’qullangan.
Eslatib o‘tamiz, “Milliy tiklanish” demokratik partiyasi deputatlari ham shu qonun loyihasini muhokama qilgan va mamlakatda elektron sigaretalarni taqiqlashni taklif qilgandi.
Izoh (0)