“O‘zgidromet” 17-noyabr kuni Qamchiq dovoni yo‘lida yaxvonlik va qor uyumlari yuzaga kelishidan ogohlantirdi

“O‘zgidromet” Qamchiq dovoni yo‘lida yaxvonlik va qor uyumlari yuzaga kelishi mumkinligi sababli ogohlantirish bilan chiqdi.

Markaz ma’lumotlariga ko‘ra, 17-noyabr kuni A-373 Toshkent—O‘sh avtomobil yo‘lining Qamchiq davoni hududida qor ko‘rinishida yog‘ingarchilik, vaqti vaqti bilan kuchli yog‘ingarchilik bo‘lishi mumkin. Tuman, ko‘rinuvchanlik 50 metrgacha pasayishi, shamol tezligi 17–22 metr/sekunddan 25-27 metr/sekundgacha kuchayishi kutilmoqda. Yo‘llarda yaxvonlik va qor uyumlari yuzaga kelishi mumkin.

Eslatib o‘tamiz, 17—18-noyabrda respublikaning barcha hududiga Volga bo‘yi orqali Rossiyaning Yevropa hududi (Moskva viloyati) ustida shakllangan nam va sovuq havo massasi kirib keladi.

16—17-noyabrda respublika bo‘yicha shamol tezligi 17-22 metr/sekundgacha kuchayishi kutilmoqda, ba’zida 25-28 metr/sekundgacha kuchayishi mumkin. Ba’zi joylarda changli bo‘ron bo‘ladi.