Rossiya Xalqaro kosmik stansiyadagi (XKS) kosmonavtlar va astronavtlar uchun xavf tug‘diruvchi sun’iy yo‘ldoshga qarshi qurollarni sinovdan o‘tkazdi. Bu haqda AQSh Davlat departamenti vakili Ned Prays ma’lum qildi.
Praysning so‘zlariga ko‘ra, qurollar 15-noyabrda sinovdan o‘tkazilgan; nishon Rossiya sun’iy yo‘ldoshlaridan biri bo‘lgan. Buning natijasida 1500 dan ortiq kosmik qoldiqlar (ularni kuzatish mumkin) va barcha mamlakatlar manfaatlariga tahdid soladigan yuz minglab kichikroq obyektlar hosil bo‘ldi, dedi Prays.
U sinovlarni “xavfli va mas’uliyatsizlik bilan qilingan” deb atadi. “Biz Rossiya Federatsiyasi va boshqalarga bunga toqat qilmasligimizni tushuntirish uchun butun dunyodagi ittifoqchilarimiz va hamkorlarimiz bilan maslahat qilamiz”, — dedi Davlat departamenti rasmiysi.
15-noyabr kuni ertalab ma’lum bo‘lishicha, XKS ekipaji kosmik chiqindilar bilan to‘qnashish xavfi tufayli “Soyuz” va Crew Dragon kosmik kemalaridan panoh topgan.
AQSh rasmiylari avval ham Rossiyaning 2020-yil aprel va dekabr oylarida kosmik qurollarni sinovdan o‘tkazgani haqida xavotir bildirgandi. Rossiya Tashqi ishlar vazirligi matbuot kotibi Mariya Zaxarova bu bayonotlarni AQShning o‘z qurollarini kosmosga joylashtirishni oqlashga urinishi deb atagan.
Izoh (0)