Россия Халқаро космик станциядаги (ХКС) космонавтлар ва астронавтлар учун хавф туғдирувчи сунъий йўлдошга қарши қуролларни синовдан ўтказди. Бу ҳақда АҚШ Давлат департаменти вакили Нед Прайс маълум қилди.
Прайснинг сўзларига кўра, қуроллар 15 ноябрда синовдан ўтказилган; нишон Россия сунъий йўлдошларидан бири бўлган. Бунинг натижасида 1500 дан ортиқ космик қолдиқлар (уларни кузатиш мумкин) ва барча мамлакатлар манфаатларига таҳдид соладиган юз минглаб кичикроқ объектлар ҳосил бўлди, деди Прайс.
У синовларни «хавфли ва масъулиятсизлик билан қилинган» деб атади. «Биз Россия Федерацияси ва бошқаларга бунга тоқат қилмаслигимизни тушунтириш учун бутун дунёдаги иттифоқчиларимиз ва ҳамкорларимиз билан маслаҳат қиламиз», — деди Давлат департаменти расмийси.
15 ноябрь куни эрталаб маълум бўлишича, ХКС экипажи космик чиқиндилар билан тўқнашиш хавфи туфайли «Союз» ва Crew Dragon космик кемаларидан паноҳ топган.
АҚШ расмийлари аввал ҳам Россиянинг 2020 йил апрель ва декабрь ойларида космик қуролларни синовдан ўтказгани ҳақида хавотир билдирганди. Россия Ташқи ишлар вазирлиги матбуот котиби Мария Захарова бу баёнотларни АҚШнинг ўз қуролларини космосга жойлаштиришни оқлашга уриниши деб атаган.
Изоҳ (0)