Hukumat tomonidan Oliy Majlis Qonunchilik palatasiga 2022-yil uchun Davlat budjeti loyihasi va Budjetnomada kiritildi. Bu haqda deputat Doniyor G‘aniyev o‘z Telegram-kanalida xabar berdi.
Hujjatga ko‘ra, fuqarolarga mulkiy munosabatlarni amalga oshirishda davlat ro‘yxatidan o‘tkazish jarayonlarini yengillashtirish va mulk huquqini to‘laqonli tasarruf etishga qulay sharoitlarni yaratish maqsadida 2022-yil 1-yanvardan boshlab avtotransport vositalarini sotib olganlik uchun yig‘im to‘liq bekor qilinadi.
Bundan tashqari, deputatning yozishicha, uning Moliya vazirligidagi manbalari “Davlat boji to‘g‘risida”gi qonunga o‘zgartish kiritilishi kutilayotganini ma’lum qilgan. Unga muvofiq, avtomobil oldi-sotdi shartnomasini notarial rasmiylashtirish uchun undiriladigan davlat boji, transport vositasining ot kuchi va ishlab chiqarilgan sanasidan qat’i nazar BHMning 3 barobari (810 ming so‘m) etib belgilanadi. Amalda BHMning 2 barobaridan 10 baravarigacha (540 ming so‘mdan — 2,7 million so‘mgacha) miqdorda belgilangan.
“Demak, ‘2022-yil uchun Davlat budjeti to‘g‘risida’gi qonunni qabul qilinishi hamda ‘Davlat boji to‘g‘risida’gi qonunga tegishli o‘zgartirish kiritish ortidan ikkilamchi bozordan sotib olingan avtomobilni rasmiylashtirish xarajatlari keskin kamayadi”, – deb yozmoqda deputat.
Amaldagi tartibga asosan ot kuchi 105 bo‘lgan va ishlab chiqarilgan sanasi 3 yildan ko‘p bo‘lmagan Nexia avtomobilini oldi-sotdi shartnomasini notarial rasmiylashtirish uchun o‘rtacha 5 million 535 ming so‘m xarajat talab qilinayotgan bo‘lsa, qonunchilikka yuqoridagi o‘zgartirishlar kiritilgandan so‘ng (2022-yildan) bu xarajatlar taxminan 4 million so‘mga kamayib, 1,6 million so‘m atrofida bo‘ladi.
“Statistik ma’lumotlarga ko‘ra mamlakatda bir yilda 300 mingdan ortiq (ishonchnomalar bilan hisoblaganda aslida 700 mingdan oshadi) avtomobil oldi-sotdi shartnomalari amalga oshirilishini inobatga olsak, ko‘zda tutilayotgan bu ijobiy o‘zgarishlar natijasida fuqarolar ixtiyorida qo‘shimcha 1,2 trillion so‘mdan ortiq mablag‘ qoldiriladi”, – deydi deputat.
Avvalroq Doniyor G‘aniyev ikkilamchi bozordagi avtomobillar oldi-sotdisidagi bojlarni pasaytirishni so‘rab deputatlik so‘rovi yuborgani, mazkur so‘rovga Moliya vazirligi 2022-yil budjet parametrlarini shakllantirishda avtotransport vositalarini sotib olganlik uchun undiriladigan yig‘imlarni bekor qilish ko‘zda tutilayotganini ma’lum qilgani to‘g‘risida xabar berilgandi.
Izoh (0)