Ҳукумат томонидан Олий Мажлис Қонунчилик палатасига 2022 йил учун Давлат бюджети лойиҳаси ва Бюджетномада киритилди. Бу ҳақда депутат Дониёр Ғаниев ўз Telegram-каналида хабар берди.
Ҳужжатга кўра, фуқароларга мулкий муносабатларни амалга оширишда давлат рўйхатидан ўтказиш жараёнларини енгиллаштириш ва мулк ҳуқуқини тўлақонли тасарруф этишга қулай шароитларни яратиш мақсадида 2022 йил 1 январдан бошлаб автотранспорт воситаларини сотиб олганлик учун йиғим тўлиқ бекор қилинади.
Бундан ташқари, депутатнинг ёзишича, унинг Молия вазирлигидаги манбалари «Давлат божи тўғрисида»ги қонунга ўзгартиш киритилиши кутилаётганини маълум қилган. Унга мувофиқ, автомобиль олди-сотди шартномасини нотариал расмийлаштириш учун ундириладиган давлат божи, транспорт воситасининг от кучи ва ишлаб чиқарилган санасидан қатъи назар БҲМнинг 3 баробари (810 минг сўм) этиб белгиланади. Амалда БҲМнинг 2 баробаридан 10 бараваригача (540 минг сўмдан — 2,7 миллион сўмгача) миқдорда белгиланган.
«Демак, ‘2022 йил учун Давлат бюджети тўғрисида’ги қонунни қабул қилиниши ҳамда ‘Давлат божи тўғрисида’ги қонунга тегишли ўзгартириш киритиш ортидан иккиламчи бозордан сотиб олинган автомобилни расмийлаштириш харажатлари кескин камаяди», – деб ёзмоқда депутат.
Амалдаги тартибга асосан от кучи 105 бўлган ва ишлаб чиқарилган санаси 3 йилдан кўп бўлмаган Nexia автомобилини олди-сотди шартномасини нотариал расмийлаштириш учун ўртача 5 миллион 535 минг сўм харажат талаб қилинаётган бўлса, қонунчиликка юқоридаги ўзгартиришлар киритилгандан сўнг (2022 йилдан) бу харажатлар тахминан 4 миллион сўмга камайиб, 1,6 миллион сўм атрофида бўлади.
«Статистик маълумотларга кўра мамлакатда бир йилда 300 мингдан ортиқ (ишончномалар билан ҳисоблаганда аслида 700 мингдан ошади) автомобиль олди-сотди шартномалари амалга оширилишини инобатга олсак, кўзда тутилаётган бу ижобий ўзгаришлар натижасида фуқаролар ихтиёрида қўшимча 1,2 триллион сўмдан ортиқ маблағ қолдирилади», – дейди депутат.
Аввалроқ Дониёр Ғаниев иккиламчи бозордаги автомобиллар олди-сотдисидаги божларни пасайтиришни сўраб депутатлик сўрови юборгани, мазкур сўровга Молия вазирлиги 2022 йил бюджет параметрларини шакллантиришда автотранспорт воситаларини сотиб олганлик учун ундириладиган йиғимларни бекор қилиш кўзда тутилаётганини маълум қилгани тўғрисида хабар берилганди.
Изоҳ (0)