89 yoshli amerikalik shifokor Manfred Shtayner fizika bo‘yicha doktorlik darajasini oldi. Bu uning bir umrlik orzusi bo‘lgan.
O‘smirligida Venada yashagan va fizik bo‘lishni orzu qilgan Shtayner Albert Eynshteyn va Maks Plankaning ishlaridan ilhomlangan. Ikkinchi jahon urishidan keyin onasi va tog‘asi unga shifokor bo‘lishni maslahat bergan. Shundan keyin u Vena universitetida tibbiyot yo‘nalishida o‘qigan. Bir necha haftadan keyin AQShga ketib, qon kasalliklarini o‘rgangan. 1985—1994-yillarda esa Braun tibbiyot maktabining gematologiya bo‘limiga rahbarlik qilgan.
70 yoshida Braun universitetining bakalavr yo‘nalishidagi darslarga qatnay boshlagan, 2007-yilga kelib esa universitetning doktoranturasiga qabul qilingan. Dastlab keksa talabasiga shubha bilan qaragan professor Bred Martson keyinchalik Shtaynerning darsga jiddiy yondashishini payqagan va uning dissertatsiyasi uchun maslahatchi bo‘lishga qaror qilgan.
Erkak doktorlik ishini 2021-yilning sentabrida — og‘ir kasallikdan tuzalganidan so‘ng yoqlagan. Shtaynerning aytishicha, fan bo‘yicha uchinchi darajaga ega bo‘lish hayotidagi eng yoqimli lahza bo‘lgan. “Bu men uchun hech qachon ushalmaydigandek, ammo shu bilan tafakkurimni chulg‘ab olgan istak edi”, — degan u.
Unga turli mamlakatlardan qanday qilib orzuga erishish mumkinligi so‘ralgan bir qancha maktub yo‘llangan. 57 yashar matematikni o‘spirin deb atagan Shtayner unga fan bilan shug‘ullanishda davom etishni tavsiya qilgan.
Ma’lumot uchun, Shtayner doktorlik darajasini olganlar orasida eng keksa odam emas. Ginnesning Rekordlar kitobida qayd qilinishicha, germaniyalik Xayns Vanderot 2008-yilda doktorlik darajasini olgan va u bu vaqtda 97 yosh bo‘lgan.
Izoh (0)