111 yoshli ruminiyalik dunyoning eng keksa erkagiga aylandi

Buxarestda yashovchi 111 yoshli Dumitru Komenesku sayyoraning eng keksa erkagi deb tan olindi. Bu haqda Gerontologiya tadqiqot guruhi xabar bermoqda, deb yozadi “Korrespondent.net”

Ayni vaqtda ruminiyalik erkak 111 yoshu 7 oylik. Dumitruga uning rekordini tasdiqlovchi yorliq topshirildi. Komenesku rasman dunyoning eng keksa erkagi deb topilishi uning uchun katta sharaf ekanini ta’kidladi.

Ginnes rekordlari kitobiga ko‘ra, 2020-yilning boshida ushbu nom uchun uch kishi da’vogarlik qilgan. 2020-yil fevralida Yaponiyada 1907-yil 5-martda tug‘ilgan Kitetsu Vatanabe dunyodan o‘tgan. Yaqinda Britaniyada dunyoning eng keksa erkagi deb topilgan Robert Ueyton vafot etdi. U 1908-yil 29-martda dunyoga kelgandi. Dumitru Komeneskuning tug‘ilgan kuni 1908-yil 8-noyabrga to‘g‘ri keladi.

Dumitru muhandis-agronom va fitopatolog bo‘lgan. Uning bolalaridan tashqari uch nevarasi va ikki evarasi bor.