Америкалик эркак 89 ёшида физика бўйича фан доктори бўлди. Бу унинг бутун умрлик орзуси бўлган

89 ёшли америкалик шифокор Манфред Штайнер физика бўйича докторлик даражасини олди. Бу унинг бир умрлик орзуси бўлган.

Ўсмирлигида Венада яшаган ва физик бўлишни орзу қилган Штайнер Альберт Эйнштейн ва Макс Планканинг ишларидан илҳомланган. Иккинчи жаҳон уришидан кейин онаси ва тоғаси унга шифокор бўлишни маслаҳат берган. Шундан кейин у Вена университетида тиббиёт йўналишида ўқиган. Бир неча ҳафтадан кейин АҚШга кетиб, қон касалликларини ўрганган. 1985—1994 йилларда эса Браун тиббиёт мактабининг гематология бўлимига раҳбарлик қилган.

70 ёшида Браун университетининг бакалавр йўналишидаги дарсларга қатнай бошлаган, 2007 йилга келиб эса университетнинг докторантурасига қабул қилинган. Дастлаб кекса талабасига шубҳа билан қараган профессор Брэд Мартсон кейинчалик Штайнернинг дарсга жиддий ёндашишини пайқаган ва унинг диссертацияси учун маслаҳатчи бўлишга қарор қилган.

Эркак докторлик ишини 2021 йилнинг сентябрида — оғир касалликдан тузалганидан сўнг ёқлаган. Штайнернинг айтишича, фан бўйича учинчи даражага эга бўлиш ҳаётидаги энг ёқимли лаҳза бўлган. «Бу мен учун ҳеч қачон ушалмайдигандек, аммо шу билан тафаккуримни чулғаб олган истак эди», — деган у.

Унга турли мамлакатлардан қандай қилиб орзуга эришиш мумкинлиги сўралган бир қанча мактуб йўлланган. 57 яшар математикни ўспирин деб атаган Штайнер унга фан билан шуғулланишда давом этишни тавсия қилган.

Маълумот учун, Штайнер докторлик даражасини олганлар орасида энг кекса одам эмас. Гиннеснинг Рекордлар китобида қайд қилинишича, германиялик Хайнс Вандерот 2008 йилда докторлик даражасини олган ва у бу вақтда 97 ёш бўлган.