Bosh prokuratura jamoatchilik bilan aloqalar va huquqiy axborot bo‘limi prokurori lavozimida ishlab kelgan Samir Rahmonov 26-aprel kuni 33 yoshida vafot etgandi. Uning otasi kafolatlangan nafaqa pullarini to‘lamagani uchun Bosh prokuraturani sudga berdi, ammo sud uning da’vosini rad qildi. Bandlik va mehnat munosabatlari vazirligining Davlat mehnat inspeksiyasi ushbu holat yuzasidan izoh berdi.
Unda aytilishicha, tashkilotlarda mehnat faoliyati bilan bog‘liq ravishda sodir bo‘lgan baxtsiz hodisalar va boshqa jarohatlanishlarni tekshirish va hisobini yuritish, ishlab chiqarishdagi baxtsiz hodisalarni va xodimlar salomatligining mehnat vazifalarini bajarish bilan bog‘liq boshqa xil zararlanishini tekshirish va hisobga olish to‘g‘risidagi nizomga muvofiq amalga oshiriladi.
Tashkilot hududida va uning tashqarisida xodimning mehnat vazifalarini bajarayotganda yuz bergan jarohatlanishi yoki salomatlikning boshqa xil shikastlanishi mehnat faoliyati bilan bog‘liq ravishda sodir bo‘lgan baxtsiz hodisalar hisoblanadi.
Mazkur nizomning 1-bo‘lim, 3-bandiga asosan tabiiy o‘lim, o‘zini o‘zi o‘ldirish, jabrlanuvchining o‘z salomatligiga qasddan shikast yetkazishi, shuningdek, jabrlanuvchining jinoyat sodir qilish chog‘ida shikastlanishi holatlari (sud-tibbiy ekspertiza xulosasi yoki tergov organlarining ma’lumotlariga ko‘ra) tekshirilmaydi va hisobga olinmaydi.
Nizomning 3-bo‘limi, 2-bandiga asosan guruhli, oqibati o‘rtacha og‘ir yoki og‘ir va o‘lim bilan tugagan baxtsiz hodisa to‘g‘risida ish beruvchi darhol sxemaga binoan quyidagilarga xabar berishi kerak:
- Bandlik va mehnat munosabatlari vazirligiga;
- Toshkent shahar Bandlik bosh boshqarmasiga;
- baxtsiz hodisa yuz bergan joydagi hududiy ichki ishlar organiga;
- ish beruvchining fuqarolik javobgarligini majburiy sug‘urta qilish shartnomasi bo‘yicha sug‘urtalovchiga.
Marhum Samir Rahmonov otasining Fuqarolik ishlari bo‘yicha Mirobod tumanlararo sudiga farzandi vafoti munosabati bilan Bosh prokuraturadan nafaqa puli undirish haqidagi da’vo arizasi va ma’naviy zararni undirish to‘g‘risidagi qo‘shimcha da’vosi sudning 17-sentabrdagi hal qiluv qarori bilan rad qilingan.
Davlat mehnat inspeksiyasining bildirishicha, Bandlik va mehnat munosabatlari vazirligining Davlat mehnat inspeksiyasi to‘g‘risidagi nizomning 23-bandida sud organlari tomonidan qaror qabul qilingandan keyin inspeksiya vakolatiga kiradigan masalalar yuzasidan qo‘shimcha xulosalar, tushunchalar inspeksiya tomonidan berilmasligi belgilangan.
Izoh (0)