Бош прокуратура жамоатчилик билан алоқалар ва ҳуқуқий ахборот бўлими прокурори лавозимида ишлаб келган Самир Раҳмонов 26 апрель куни 33 ёшида вафот этганди. Унинг отаси кафолатланган нафақа пулларини тўламагани учун Бош прокуратурани судга берди, аммо суд унинг даъвосини рад қилди. Бандлик ва меҳнат муносабатлари вазирлигининг Давлат меҳнат инспекцияси ушбу ҳолат юзасидан изоҳ берди.
Унда айтилишича, ташкилотларда меҳнат фаолияти билан боғлиқ равишда содир бўлган бахтсиз ҳодисалар ва бошқа жароҳатланишларни текшириш ва ҳисобини юритиш, ишлаб чиқаришдаги бахтсиз ҳодисаларни ва ходимлар саломатлигининг меҳнат вазифаларини бажариш билан боғлиқ бошқа хил зарарланишини текшириш ва ҳисобга олиш тўғрисидаги низомга мувофиқ амалга оширилади.
Ташкилот ҳудудида ва унинг ташқарисида ходимнинг меҳнат вазифаларини бажараётганда юз берган жароҳатланиши ёки саломатликнинг бошқа хил шикастланиши меҳнат фаолияти билан боғлиқ равишда содир бўлган бахтсиз ҳодисалар ҳисобланади.
Мазкур низомнинг 1-бўлим, 3-бандига асосан табиий ўлим, ўзини ўзи ўлдириш, жабрланувчининг ўз саломатлигига қасддан шикаст етказиши, шунингдек, жабрланувчининг жиноят содир қилиш чоғида шикастланиши ҳолатлари (суд-тиббий экспертиза хулосаси ёки тергов органларининг маълумотларига кўра) текширилмайди ва ҳисобга олинмайди.
Низомнинг 3-бўлими, 2-бандига асосан гуруҳли, оқибати ўртача оғир ёки оғир ва ўлим билан тугаган бахтсиз ҳодиса тўғрисида иш берувчи дарҳол схемага биноан қуйидагиларга хабар бериши керак:
- Бандлик ва меҳнат муносабатлари вазирлигига;
- Тошкент шаҳар Бандлик бош бошқармасига;
- бахтсиз ҳодиса юз берган жойдаги ҳудудий ички ишлар органига;
- иш берувчининг фуқаролик жавобгарлигини мажбурий суғурта қилиш шартномаси бўйича суғурталовчига.
Марҳум Самир Раҳмонов отасининг Фуқаролик ишлари бўйича Миробод туманлараро судига фарзанди вафоти муносабати билан Бош прокуратурадан нафақа пули ундириш ҳақидаги даъво аризаси ва маънавий зарарни ундириш тўғрисидаги қўшимча даъвоси суднинг 17 сентябрдаги ҳал қилув қарори билан рад қилинган.
Давлат меҳнат инспекциясининг билдиришича, Бандлик ва меҳнат муносабатлари вазирлигининг Давлат меҳнат инспекцияси тўғрисидаги низомнинг 23-бандида суд органлари томонидан қарор қабул қилингандан кейин инспекция ваколатига кирадиган масалалар юзасидан қўшимча хулосалар, тушунчалар инспекция томонидан берилмаслиги белгиланган.
Изоҳ (0)