O‘zbekistonda yoshlar bo‘yicha mahallagacha tushadigan vertikal tizim yaratiladi

Shavkat Mirziyoyev raisligida o‘tayotgan videoselektor yig‘ilishida davlat rahbari yoshlar siyosati bo‘yicha ustuvor yo‘nalishlar va katta marralar belgilanganini bildirdi. Bu haqda “Daryo” muxbiri xabar qilmoqda.

“Bu borada 2020-yili boshlagan ishlar davomiyligini ta’minlab, o‘tgan yili tashkil etilgan yoshlar bo‘yicha mahallagacha tushadigan vertikal tizim yaratiladi.

Bunda, mavjud imkoniyatlardan kelib chiqib, har bir mahallada viloyat hokimining yordamchisi – yoshlar yetakchisi lavozimi joriy etiladi.

Yoshlar siyosati eng muhim masalalardan biri ekanini inobatga olib, ushbu yoshlar Prezident vakili bo‘ladi.

Ularning asosiy vazifalari:

• “yoshlar daftari” va yoshlar dasturlarini shakllantirish va ularning ijrosini ta’minlash;
• mahalladagi har bir yoshlar bilan manzilli ishlab, ularni muammolarini hal etish;
• yoshlarning bo‘sh vaqtlarini mazmunli tashkil etish, ayniqsa “Beshta muhim tashabbus” ijrosini tashkil etish;
• yoshlarni vatanparvarlik ruhida tarbiyalash;
• hokim yordamchilari bilan birgalikda yoshlarning kasbiy ko‘nikmalarini shakllantirish va bandligini ta’minlashdan iborat.

Mas’ullar viloyat, tuman va shahar hokimlari bilan birga, 15-noyabrdan joylarga chiqib, harbiy xizmatni o‘tagan, yoshlarni ortidan ergashtira oladigan, sadoqatli, fidoiy nomzodlarni tanlab, ularni o‘qitishni tashkil etishi bildirildi.

“Har bitta hokimning yoshlarning hafta davomida madaniyat, kitob o‘qish, sport bilan shug‘ullanish, kasb-hunarni o‘rganish bo‘yicha kunlik rejalari bo‘lishi shart. Bugun hokimlar ushbu ishlarni qanday tashkil etishi to‘g‘risida aniq-aniq hisobot beradi”, – deydi davlat rahbari.

Prezident har bir mahallada stadion va sport majmualarida yoshlarni mashg‘ul qilish, u yerlarda san’atkorlar ishtirokida konsert dasturlari berilishi, yoshlarning vaqtini mazmunli tashkil etish kerakligini bildirdi.

“O‘zingiz ham oliy ta’lim muassasalari yotoqxonalariga boring, sport kiyimlarida yurib, namuna bo‘ling”, – dedi Prezident.