AQSh Ichki xavfsizlik vazirligi prezident Jo Baydenning administratsiyasi tomonidan o‘tkazilgan tadbirlar doirasida Afg‘onistondan evakuatsiya qilingan qochoqlar immigratsion hujjatlarni rasmiylashtirishda to‘lanadigan to‘lovlardan ozod etilishini ma’lum qildi, deb xabar beradi “TASS”.

Foto: “Ridus.ru”

“Vazirlik 2021-yilning 30-iyulidan boshlab o‘tkazilgan gumanitar yordamlar sabab AQShga kirishiga ruxsat etilgan Afg‘oniston fuqarolariga immigratsion hujjatlarni olishda to‘lanadigan bojdan ozod etishini va ushbu jarayon soddalashtirilishini e’lon qiladi”, — deyiladi idora bayonotida.

Unda ko‘rsatilishicha, qochoqlardan ishga joylashishda ariza taqdim etishda, shuningdek, grin-kartani — AQShda muqim yashash huquqini beruvchi shaxsni tasdiqlovchi guvohnomani olishda to‘lanadigan to‘lovlar undirilmaydi. ABC telekanalining ta’kidlashicha, hozirda yuqoridagi xizmatning birinchisi uchun 410 dollar miqdorida boj solingan, ikkinchisi uchun esa to‘lov 1225 dollargacha yetishi mumkin.

The Washington Post gazetasining ma’lumotlariga ko‘ra, 17-avgustdan boshlab Qo‘shma Shtatlarga o‘z vaqtida Amerika qo‘shinlariga turli yordamlarni ko‘rsatgan 60 mingdan ortiq afg‘on evakuatsiya qilingan. 7-oktabr kuni Pentagon AQSh hukumati Afg‘onistondan fuqarolarni evakuatsiya qilishni qayta yo‘lga qo‘yganini ma’lum qilgandi.

Eslatib o‘tamiz, AQSh va uning ittifoqchilari Afg‘onistondan qo‘shinlarini olib chiqa boshlagach, “Tolibon” respublikada keng ko‘lamli hujumlar boshladi. “Tolibon” Afg‘onistonda kuchayib borayotganiga qaramay, Jo Bayden mamlakatdan qo‘shinlarini olib chiqish rejasini o‘zgartirmasligini ma’lum qildi.

15-avgust kuni “Tolibon” jangarilari Kobulga kirdi va Afg‘onistonning butun hududini nazorat ostiga olganini e’lon qildi. Shu kuniyoq mamlakat prezidenti Ashraf G‘ani iste’foga chiqib, mamlakatni tark etdi. Afg‘oniston maxsus kuchlari tarqatib yuborildi, aholidan qurol-yarog‘lar musodara qilindi.

Keyinroq Bayden Afg‘onistondagi vaziyat yuzasidan nutq so‘zlab, Amerika qo‘shinlarini Afg‘onistondan olib chiqish to‘g‘risidagi qaroridan afsuslanmasligini aytdi. “Biz afg‘onlarga o‘z kelajagini qurishi uchun hamma narsani berdik. Ammo ushbu kelajak uchun kurashish istagini bera olmaymiz”, — dedi Bayden.