Ijtimoiy tarmoqlarda Qashqadaryo viloyatining Dehqonobod, Chiroqchi hamda Yakkabog‘ kabi bir nechta tog‘oldi tumanlarida qor yog‘ayotgani tasvirlangan videolar tarqaldi.
Gidrometeorologik ilmiy tahlillar, ob-havo prognozlari, tadqiqotlar, ma’ruzalar kanali muallifining yozishicha, bu nam oqim janub hududlardan kirib kelgan va sovuq oqim emas. Shu sababli Qashqadaryoning tekislik hududlarida qor yog‘ish ehtimoli kam.
Shuningdek, ma’lum qilinishicha, Qarshi shahrida ayni dam yomg‘ir yog‘moqda. Janub Afg‘onistondan kirib kelgan nam havo oqimi avval Surxondaryo, so‘ngra Qashqadaryo viloyati ayrim hududlariga yog‘ingarchiliklar bilan kirib kelgan. Nam havo oqim yo‘nalishi shimolga, ya’ni Samarqand viloyati hududlariga yo‘nalgani aytilmoqda.
Bundan tashqari, ijtimoiy tarmoqlarda Samarqand viloyatining Pastdarg‘om, Nurobod tumanlari va Chelak shaharchasiga qor yog‘ayotgani tasvirlangan videolar tarqaldi.
Eslatib o‘tamiz, 4-noyabrdan boshlab O‘zbekistonning bir qator hududlarida so‘nggi 150 yil ichida kuzatilmagan kuchli chang-g‘ubor hodisasi yuz berdi. Xususan, Toshkentda chang miqdori ruxsat etilgan me’yordan 5 barobarga, keyinroq mahalliy vaqt bilan soat 21:00 va 23:00 orasida 30 barobargacha ko‘tarilgani qayd etildi va poytaxt havoning ifloslanish darajasi bo‘yicha dunyoda birinchi o‘ringa chiqdi.
Chang bo‘roni tufayli tez yordamga chaqiriqlar soni oshdi. Chang tufayli atrofni ko‘rish darajasi cheklangani va oraliq masofa saqlanmagani sabab Navoiy viloyatida bir kishining o‘limi bilan yakunlangan YTH ham yuz berdi.
“O‘zgidromet” 7-noyabr kuni Toshkent havosidagi ifloslanish darajasi kamaya boshlaganini ma’lum qildi.
Izoh (0)