Toshkentda bir guruh shaxslar o‘rtasida sodir bo‘lgan janjal videosi bo‘yicha rasmiy ma’lumot berildi

Toshkent shahar IIBB ijtimoiy tarmoqlarda tarqalgan bir necha fuqaro o‘rtasida yuz bergan janjal videosi yuzasidan rasmiy ma’lumot berdi.

Ma’lum qilinishicha, 31-oktabr kuni soat 22:00 larda poytaxtnig Bog‘ishamol ko‘chasida bir nechta fuqarolar o‘rtasida janjal yuz bergan. Xususan, 30 yoshli J.I. va uning tanishlari 30 yoshli M.X., 39 yoshli J.A., 24 yoshli U.R., 37 yoshli X.A., 27 yoshli X.S., 30 yoshli U.D. o‘zaro janjallashgan. Natijada gumonlanuvchilardan biri 30 yoshli J.I. qochmoqchi bo‘lgan Chevrolet Equinox rusumli avtomobilga zarar yetkazgan.

Mazkur holat yuzasidan Yunusobod tumani IIO FMB tergov bo‘limi tomonidan Jinoyat kodeksining 277-moddasi (bezorilik) 2-qismi “b” va “v” bandlari bilan jinoyat ishi qo‘zg‘atilgan. Hozirda tergov davom etmoqda.

Avvalroq Farg‘onada bir guruh shaxslar do‘konlardan birining oynalarini sidirib, yoqib yuborgani va holat yuzasidan jinoyat ishi qo‘zg‘atilgani, Surxondaryoda bir guruh fuqarolar o‘rtasida sodir bo‘lgan mushtlashuv sodir bo‘lgani, Qashqadaryoda ikki mast fuqaro uch kishi bilan janjallashib, ularni jarohatlagani to‘g‘risida xabar berilgandi.