Ижтимоий тармоқларда Қашқадарё вилоятининг Деҳқонобод, Чироқчи ҳамда Яккабоғ каби бир нечта тоғолди туманларида қор ёғаётгани тасвирланган видеолар тарқалди.
Гидрометеорологик илмий таҳлиллар, об-ҳаво прогнозлари, тадқиқотлар, маърузалар канали муаллифининг ёзишича, бу нам оқим жануб ҳудудлардан кириб келган ва совуқ оқим эмас. Шу сабабли Қашқадарёнинг текислик ҳудудларида қор ёғиш эҳтимоли кам.
Шунингдек, маълум қилинишича, Қарши шаҳрида айни дам ёмғир ёғмоқда. Жануб Афғонистондан кириб келган нам ҳаво оқими аввал Сурхондарё, сўнгра Қашқадарё вилояти айрим ҳудудларига ёғингарчиликлар билан кириб келган. Нам ҳаво оқим йўналиши шимолга, яъни Самарқанд вилояти ҳудудларига йўналгани айтилмоқда.
Бундан ташқари, ижтимоий тармоқларда Самарқанд вилоятининг Пастдарғом, Нуробод туманлари ва Челак шаҳарчасига қор ёғаётгани тасвирланган видеолар тарқалди.
Эслатиб ўтамиз, 4 ноябрдан бошлаб Ўзбекистоннинг бир қатор ҳудудларида сўнгги 150 йил ичида кузатилмаган кучли чанг-ғубор ҳодисаси юз берди. Хусусан, Тошкентда чанг миқдори рухсат этилган меъёрдан 5 баробарга, кейинроқ маҳаллий вақт билан соат 21:00 ва 23:00 орасида 30 баробаргача кўтарилгани қайд этилди ва пойтахт ҳавонинг ифлосланиш даражаси бўйича дунёда биринчи ўринга чиқди.
Чанг бўрони туфайли тез ёрдамга чақириқлар сони ошди. Чанг туфайли атрофни кўриш даражаси чеклангани ва оралиқ масофа сақланмагани сабаб Навоий вилоятида бир кишининг ўлими билан якунланган ЙТҲ ҳам юз берди.
«Ўзгидромет» 7 ноябрь куни Тошкент ҳавосидаги ифлосланиш даражаси камая бошлаганини маълум қилди.
Изоҳ (0)