Farg‘onadagi mehribonlik uylarida ham tarbiyalanuvchi qolmadi. Muassasalar faoliyati to‘xtatildi

Farg‘ona viloyatida ”Mehribonlik uyi” deb nomlangan muassasalar eshiklari butkul yopildi, deb xabar berildi “Axborot 24” informatsion dasturida.

Qayd etilishicha, Dang‘ara tumanida yashovchi Berdiyevlar oilasi 6 nafar tarbiyalanuvchini asrab olib, “Bolalar baxti” nomli oilaviy bolalar uyini tashkil qilgan.

“Mehribonlik uyiga borib, psixolog lavozimida ishlay boshladim. U yerda bolalarga o‘rganib qolib, ularni o‘z farzandimdek qabul qildim. Oilaviy bolalar uylari ochila boshlagach, turmush o‘rtog‘im bilan maslahatlashib, 2 ta farzandimni 8 ta qilib oldim”, — degan Oysanamxon Berdiyeva.

Shuningdek, Furqat tumanida Hurriyat Komilova 5 nafar bolani farzandlikka olib, “Mehribon qalb” oilaviy mehribonlik uyini ochgan. Shu tumandagi Obodon qishlog‘ida yana bir shunday muassasa ochilgan, Nazokat Komilova 6 nafar tarbiyalanuvchi qizni asrab olgan.

Ta’kidlanishicha, Qo‘qon shahri, O‘zbekiston va Toshloq tumanlarida ham oilaviy mehribonlik uylari tashkil etilgan.

111 nafar tarbiyalanuvchidan 57 tasi oilalarga, 20 nafari patronatga, 16 tarbiyalanuvchi vasiylikka berilib, mehribonlik uylarida bolalar qolmagan. “Bola asrab olish uchun Namangan va Andijon viloyatlaridan ham kelishdi”, — deyiladi xabarda.

Ma’lum bo‘lishicha, bo‘shab qolgan muassasaning sobiq ishchi-xodimlari mutaxassisligi bo‘yicha yashash manzillariga yaqin bo‘lgan joylarda ish bilan ta’minlanmoqda.

Qayd etilishicha, avvalroq Navoiyda ham mehribonlik uylari faoliyati to‘xtagandi. Shuningdek, Namangandagi mehribonlik uyini oxirgi 5 nafar bola tark etgani, dargohda tarbiyalanuvchi qolmagani ham xabar qilingan. Bundan tashqari, Farg‘ona tumanida yashovchi Valiyevlar oilasi 6 nafar yetim bolani asrab olgani ma’lum qilingan.