Qashqadaryo viloyatining Nishon tumanidagi bolalar bog‘chasida ayollar janjali yuz berdi. “Daryo”ga taqdim qilingan videodan anglashilishicha, unda bog‘cha mudirasi ham ishtirok etgan.
“Daryo” muxbiri bilan suhbatlashgan murojaatchining ma’lum qilishicha, voqea 1-noyabr kuni ertalab soat 08:30—09:00 atrofida sodir bo‘lgan. “Tumandagi 1-sonli davlat bolalar bog‘chasi mudirasi I.F. va uning qizlari avvaliga singlimni haqoratlab, so‘ngra unga qo‘l ko‘targan. Shuningdek, tilga olib bo‘lmas so‘zlar bilan haqoratlagan”, — deydi u.
Murojaatchining so‘zlariga ko‘ra, Nishon tumanidagi 1-sonli davlat maktabgacha ta’lim tashkiloti rahbari I.F. bog‘chada 2018-yildan beri yordamchi tarbiyachi bo‘lib ishlab kelayotgan G.D.ni sababsiz ishdan bo‘shatgan. Shuningdek, haqoratlab “yo‘q qilmoqchiligini” bildirgan. Bunga javoban esa G.D.ning yaqinlari bog‘chaga borgan va videoda aks etgan to‘polon yuz bergan.
Nishon tuman maktabgacha ta’lim bo‘limi mudiri Bahriddin Davlonovning “Daryo” muxbiriga ma’lum qilishicha, rahbar xodimning ishga o‘z vaqtida kelmagani va muntazam ravishda ish qoldirgani bois ishdan bo‘shatgan.
“Nima bo‘lganda ham G.D.ning yaqinlari davlat bog‘chasiga bostirib bormasligi kerak edi. Asossiz ishdan bo‘shatgan bo‘lsa, ishini sud orqali tiklatsa bo‘lar edi-ku”, — deydi Bahriddin Davlonov.
Nishon tuman maktabgacha ta’lim tashkiloti rahbarining so‘zlariga ko‘ra, 1-sonli davlat maktabgacha ta’lim tashkiloti rahbari G.D.ni avval ham ishdan bo‘shatgan.
“Biroq G.D. boquvchisini yo‘qotgani, shuningdek, farzandlarini yolg‘iz tarbiyalayotgani uchun o‘qishdan tashqari vaqtda yarim stavka ishlashiga ruxsat berilgan. Ishga tiklangan”, — deydi bo‘lim mas’uli.
Murojaatchi fuqaro Bahriddin Davlonovning fikriga qo‘shimcha tarzda, G.D. ikki marotaba emas, uch marotaba asossiz tarzda ishdan bo‘shatilganini, 1-noyabrdagi holat uchinchisi ekanini bildirmoqda.
“O‘zi mojaroning boshlanishi boshqacha edi. I.F.ning turmush o‘rtog‘i tuman xalq ta’limi bo‘limiga bir oy rahbarlik qildi. So‘ng sobiq rahbar sud orqali ishini tiklab, vazifasiga qaytdi. Shu haqdagi buyruqni men Telegram’dagi guruhlarning biriga tashlagandim. Buni ko‘rgan I.F. singlimga ‘Sening akang, erimning ishdan bo‘shatilganini, tuman xalq ta’limi bo‘limi mudiri lavozimiga tayinlanganini internetda tarqatib yuribdi. Biz er-xotin shuning hisobiga asab bo‘ldik, endi sen bilan ishlolmaymiz’, deya singlimga bosim o‘tkazishga kirishgan. Shu muammo haligacha tingani yo‘q”, — deydi “Daryo” muxbiri bilan bu haqda suhbatlashgan murojaatchi.
Nishon tuman maktabgacha ta’lim bo‘limi rahbari Bahriddin Davlonovning qo‘shimcha qilishicha, voqeani o‘rganish uchun tuman hokimi tashabbusi bilan ishchi guruh tuzildi.
“Ertaga ishchi guruh vaziyatni o‘rganib, holatga baho beradi”, — deydi Bahriddin Davlonov.
Mavzuga doir:
Izoh (0)