Davlat aktivlarini boshqarish agentligi shu yilning iyul oyida Toshkent viloyati Bo‘stonliq tumanida joylashgan “Beldirsoy oromgohi” dam olish maskani dor yo‘li bilan birga sotilishini ma’lum qilgandi. Dam olish maskani savdosining ikkinchi bosqichi yakunlandi, deb xabar bermoqda Spot.
Ma’lum bo‘lishicha, Davaktiv agentligida ommaviy savdolarga chiqarilgan “Beldirsoy oromgohi” dam olish maskani va “Beldirsoy” sport bazasi (dor yo‘li)ni sotib olish bo‘yicha savdo jarayonlarining ikkinchi bosqichiga o‘tgan jami 4 nafar talabgorning yopiq konvertda taqdim etgan tijorat takliflari paketi oshkora ochilgan. Ushbu jarayonda Davlat tender komissiyasi a’zolari, talabgorlar shaxsan va pandemiya sharoitidan kelib chiqib, videokonferens aloqa vositasi orqali ishtirok etgan.
Qayd etilishicha, talabgorlarning davlat aktivini sotib olish bo‘yicha tijorat takliflari ko‘rib chiqilib, 2 nafar talabgor bilan narx taklifini yanada yaxshilash va to‘lov muddatlarini qisqartirish bo‘yicha muzokaralar o‘tkazish yuzasidan qaror qabul qilingan. Savdo jarayoni tartibiga muvofiq, Davaktiv agentligi tomonidan savdo ishtirokchilariga individual xabarnoma yuborilgan.
Eslatib o‘tamiz, agentlik 2021-yil mart oyi so‘nggida “Malika” savdo majmuasi, “Sijjak”, “Beldirsoy” va boshqa bir necha yirik obyektlar sotuvga qo‘yilganini ma’lum qilgandi. Ularning bir qanchasi o‘z xaridorini topgan. Ammo “Beldirsoy” uchun xaridor topilmagach, obyekt uchun talabgorlardan taklif qabul qilish muddati avval 1-iyul, so‘ng 15-iyulga qadar uzaytirilgan.
Izoh (0)