Toshkentda 7-noyabr kuni atmosfera havosining ifloslanish darajasi avvalgi kunga nisbatan pasaya boshladi, deb yozmoqda “O‘zgidromet”.
Ma’lum qilinishicha, shu kuni soat 11:00 da o‘tkazilgan monitoring natijalari poytaxtda chang bilan ifloslanganlik darajasi ruxsat etilgan maksimal konsentratsiyadan 3,3 baravar ortiqligini ko‘rsatgan.
Gidrometeorologik ilmiy tahlillar, ob-havo prognozlari, tadqiqotlar, ma’ruzalar kanali ham Toshkent shahri havosida o‘ta mayda dispers chang zarrachalari ancha kamaya boshlaganini qayd etgan. Unda aytilishicha, soat 15:00 da havo tarkibida RM 2,5-mayda dispers zarrachalar ruxsat etilgan me’yordan 2 barobor ko‘p bo‘lgan. Bu xavfli daraja, lekin kechagi va oldingi kunlardagi kabi o‘ta xavfli emas.
“Toshkent shahrida ayni antitsiklon kuzatilayotgan davrda mahalliy tog‘-vodiy sirkulyatsiyasini hosil qilgan bilinar-bilinmas shaboda faktori poytaxt havosidagi zarrachalar harakatida muhim rol o‘ynaydi.
Tog‘-vodiy shamoli sabab, shahar havosi kechasi chang zarrachalaridan biroz holi bo‘lgan bo‘lishi mumkin. Chunki, tog‘dan esgan kuchsiz shamol omili poytaxt havosidagi zarrachalarni shaharning janubiy-g‘arbiy tekislik hududlariga tomon ‘haydaydi’. Afsuski, kunduz kuni o‘sha tekislikdan tog‘ga esgan tog‘ vodiy shamoli yana zarrachalarni poytaxt osmoniga olib keladi. Chang zarrachalarining yerga bosilishi hisobiga, havoda zararli chang moddasi oldingi kunlarga qaraganda ancha kamaymoqda”, — deyiladi xabarda.
Eslatib o‘tamiz, 4-noyabr kuni Toshkentda chang miqdori ruxsat etilgan me’yordan 5 barobarga, keyinroq mahalliy vaqt bilan soat 21:00 va 23:00 orasida 30 barobargacha ko‘tarilgani qayd etildi va poytaxt havoning ifloslanish darajasi bo‘yicha dunyoda birinchi o‘ringa chiqdi. 6-noyabr kunduzi havoning isishi atmosferada chang tarkibi sezilarsiz kamayishiga olib keldi, ammo changli g‘ubor butunlay tarqalmadi.
Chang-bo‘ron tufayli tez yordamga chaqiriqlar soni oshdi. 5-noyabrdan 6-noyabr soat 06:00 ga qadar umumiy chaqiriqlar soni 4110 taga yetib, nafas olish bilan bog‘liq murojatlar soni 709 tani (jami chaqiriqlarning 17,2 foizi) tashkil qilgan. Shundan allergik reaksiyalar bilan 36 ta, bronxial astma huruji bilan 122 ta murojaat bo‘lib, ularning 11 tasi gospitalizatsiya qilingan.
Izoh (0)