Қашқадарёдаги боғчада аёллар жанжаллашди. Унда боғча мудираси ҳам иштирок этган (видео)

Қашқадарё вилоятининг Нишон туманидаги болалар боғчасида аёллар жанжали юз берди. «Дарё»га тақдим қилинган видеодан англашилишича, унда боғча мудираси ҳам иштирок этган.

«Дарё» мухбири билан суҳбатлашган мурожаатчининг маълум қилишича, воқеа 1 ноябрь куни эрталаб соат 08:30—09:00 атрофида содир бўлган. «Тумандаги 1-сонли давлат болалар боғчаси мудираси И.Ф. ва унинг қизлари аввалига синглимни ҳақоратлаб, сўнгра унга қўл кўтарган. Шунингдек, тилга олиб бўлмас сўзлар билан ҳақоратлаган», — дейди у.

Мурожаатчининг сўзларига кўра, Нишон туманидаги 1-сонли давлат мактабгача таълим ташкилоти раҳбари И.Ф. боғчада 2018 йилдан бери ёрдамчи тарбиячи бўлиб ишлаб келаётган Г.Д.ни сабабсиз ишдан бўшатган. Шунингдек, ҳақоратлаб «йўқ қилмоқчилигини» билдирган. Бунга жавобан эса Г.Д.нинг яқинлари боғчага борган ва видеода акс этган тўполон юз берган.

Нишон туман мактабгача таълим бўлими мудири Баҳриддин Давлоновнинг «Дарё» мухбирига маълум қилишича, раҳбар ходимнинг ишга ўз вақтида келмагани ва мунтазам равишда иш қолдиргани боис ишдан бўшатган.

«Нима бўлганда ҳам Г.Д.нинг яқинлари давлат боғчасига бостириб бормаслиги керак эди. Асоссиз ишдан бўшатган бўлса, ишини суд орқали тиклаца бўлар эди-ку», — дейди Баҳриддин Давлонов.

Нишон туман мактабгача таълим ташкилоти раҳбарининг сўзларига кўра, 1-сонли давлат мактабгача таълим ташкилоти раҳбари Г.Д.ни аввал ҳам ишдан бўшатган.

«Бироқ Г.Д. боқувчисини йўқотгани, шунингдек, фарзандларини ёлғиз тарбиялаётгани учун ўқишдан ташқари вақтда ярим ставка ишлашига рухсат берилган. Ишга тикланган», — дейди бўлим масъули.

Мурожаатчи фуқаро Баҳриддин Давлоновнинг фикрига қўшимча тарзда, Г.Д. икки маротаба эмас, уч маротаба асоссиз тарзда ишдан бўшатилганини, 1 ноябрдаги ҳолат учинчиси эканини билдирмоқда.

«Ўзи можаронинг бошланиши бошқача эди. И.Ф.нинг турмуш ўртоғи туман халқ таълими бўлимига бир ой раҳбарлик қилди. Сўнг собиқ раҳбар суд орқали ишини тиклаб, вазифасига қайтди. Шу ҳақдаги буйруқни мен Telegram’даги гуруҳларнинг бирига ташлагандим. Буни кўрган И.Ф. синглимга ‘Сенинг аканг, эримнинг ишдан бўшатилганини, туман халқ таълими бўлими мудири лавозимига тайинланганини интернетда тарқатиб юрибди. Биз эр-хотин шунинг ҳисобига асаб бўлдик, энди сен билан ишлолмаймиз’, дея синглимга босим ўтказишга киришган. Шу муаммо ҳалигача тингани йўқ», — дейди «Дарё» мухбири билан бу ҳақда суҳбатлашган мурожаатчи.

Нишон туман мактабгача таълим бўлими раҳбари Баҳриддин Давлоновнинг қўшимча қилишича, воқеани ўрганиш учун туман ҳокими ташаббуси билан ишчи гуруҳ тузилди.

«Эртага ишчи гуруҳ вазиятни ўрганиб, ҳолатга баҳо беради», — дейди Баҳриддин Давлонов.