O‘zbekistonning bir qator hududlarida, ayniqsa Toshkent shahrida 4-noyabr kuni boshlangan kuchli chang-g‘ubor hodisasi 7-noyabrga kelib ham butunlay tarqalmadi. Telegram’dagi “Exo Uzbekistana” kanali chang-g‘ubor ichidagi poytaxtning shu kuni samolyotdan olingan tasvirini e’lon qildi. Toshkentning 3000, 1000 metr balandlikdan olingan suratlarida havoda chang-g‘ubor hali ham saqlanib qolganini ko‘rish mumkin.
“Zamon.uz” esa Toshkent shahrida bo‘lib o‘tgan chang-g‘uborga to‘la qum bo‘ronining tog‘ cho‘qqilaridan ko‘rinishini taqdim etdi.
“O‘zgidromet” ma’lumotlariga ko‘ra, so‘nggi 150 yil ichida O‘zbekistonda bunday chang-g‘ubor hodisasi kuzatilmagan.
Eslatib o‘tamiz, 4-noyabr kuni Toshkentda chang miqdori ruxsat etilgan me’yordan 5 barobarga, keyinroq mahalliy vaqt bilan soat 21:00 va 23:00 orasida 30 barobargacha ko‘tarilgani qayd etildi va poytaxt havoning ifloslanish darajasi bo‘yicha dunyoda birinchi o‘ringa chiqdi. 6-noyabr kunduzi havoning isishi atmosferada chang tarkibi sezilarsiz kamayishiga olib keldi, ammo changli g‘ubor butunlay tarqalmadi.
Chang-bo‘ron tufayli tez yordamga chaqiriqlar soni oshdi. 5-noyabrdan 6-noyabr soat 06:00 ga qadar umumiy chaqiriqlar soni 4110 taga yetib, nafas olish bilan bog‘liq murojatlar soni 709 tani (jami chaqiriqlarning 17,2 foizi) tashkil qilgan. Shundan allergik reaksiyalar bilan 36 ta, bronxial astma huruji bilan 122 ta murojaat bo‘lib, ularning 11 tasi gospitalizatsiya qilingan.
Izoh (0)