«Ўзгидромет» Тошкент ҳавосида ифлосланиш даражаси камая бошлаганини маълум қилди

Тошкентда 7 ноябрь куни атмосфера ҳавосининг ифлосланиш даражаси аввалги кунга нисбатан пасая бошлади, деб ёзмоқда «Ўзгидромет».

Маълум қилинишича, шу куни соат 11:00 да ўтказилган мониторинг натижалари пойтахтда чанг билан ифлосланганлик даражаси рухсат этилган максимал концентрациядан 3,3 баравар ортиқлигини кўрсатган.

Гидрометеорологик илмий таҳлиллар, об-ҳаво прогнозлари, тадқиқотлар, маърузалар канали ҳам Тошкент шаҳри ҳавосида ўта майда дисперс чанг заррачалари анча камая бошлаганини қайд этган. Унда айтилишича, соат 15:00 да ҳаво таркибида РМ 2,5 майда дисперс заррачалар рухсат этилган меъёрдан 2 баробор кўп бўлган. Бу хавфли даража, лекин кечаги ва олдинги кунлардаги каби ўта хавфли эмас.

«Тошкент шаҳрида айни антициклон кузатилаётган даврда маҳаллий тоғ-водий циркуляциясини ҳосил қилган билинар-билинмас шабода фактори пойтахт ҳавосидаги  заррачалар ҳаракатида муҳим роль ўйнайди.

Тоғ-водий шамоли сабаб, шаҳар ҳавоси кечаси чанг заррачаларидан бироз ҳоли бўлган бўлиши мумкин. Чунки, тоғдан эсган кучсиз шамол омили пойтахт ҳавосидаги заррачаларни шаҳарнинг жанубий-ғарбий текислик ҳудудларига томон ‘ҳайдайди’. Афсуски, кундуз куни ўша текисликдан тоғга эсган тоғ водий шамоли яна заррачаларни пойтахт осмонига олиб келади. Чанг заррачаларининг ерга босилиши ҳисобига, ҳавода зарарли чанг моддаси олдинги кунларга қараганда анча камаймоқда», — дейилади хабарда.

Эслатиб ўтамиз, 4 ноябрь куни Тошкентда чанг миқдори рухсат этилган меъёрдан 5 баробарга, кейинроқ маҳаллий вақт билан соат 21:00 ва 23:00 орасида 30 баробаргача кўтарилгани қайд этилди ва пойтахт ҳавонинг ифлосланиш даражаси бўйича дунёда биринчи ўринга чиқди. 6 ноябрь кундузи ҳавонинг исиши атмосферада чанг таркиби сезиларсиз камайишига олиб келди, аммо чангли ғубор бутунлай тарқалмади.

Чанг-бўрон туфайли тез ёрдамга чақириқлар сони ошди. 5 ноябрдан 6 ноябрь соат 06:00 га қадар умумий чақириқлар сони 4110 тага етиб, нафас олиш билан боғлиқ мурожатлар сони 709 тани (жами чақириқларнинг 17,2 фоизи) ташкил қилган. Шундан аллергик реакциялар билан 36 та, бронхиал астма ҳуружи билан 122 та мурожаат бўлиб, уларнинг 11 таси госпитализация қилинган.