Xitoy Pentagonning XXR o‘zining yadroviy kuchlarini kuchaytirayotgani aytilgan hisoboti e’lon qilingani sabab AQShga norozilik bildirdi. Bu haqda Xitoy Mudofaa vazirligi rasmiy vakili U Syan ma’lum qildi, deb xabar beradi “RBK”.
“Xitoyning harbiy rivoji mutlaqo milliy suverenitet va xavfsizlikni qo‘llab-quvvatlashga mo‘ljallangan. U biror-bir mamlakatga yo‘naltirilmagan”, — deydi Mudofaa vazirligi vakili. Uning so‘zlariga ko‘ra, Pekin “mintaqaviy tinchlik, barqarorlik va farovonlikka putur yetkazish bo‘yicha har qanday urinishlarni bostiradi”.
U Szyanning aytishicha, Pentagon hisobotida “Xitoydan harbiy tahdid deb ataluvchi uydirma” mavjud. Uning so‘zlariga ko‘ra, Qo‘shma Shtatlar Xitoyni yadroviy quvvatini oshirish borasida asossiy ayblamoqda va mamlakat ichki ishlariga aralashyapti.
Xitoy Mudofaa vazirligi vakilining qo‘shimcha qilishicha, AQSh so‘nggi yillarda “qurolli kuchlarning yadro, kosmik, kibernetika, gipertovushli texnologiyalar va boshqa sohalarda rivojlanishini jadallashtirgan”. Uning so‘zlariga ko‘ra, Qo‘shma Shtatlar “dunyodagi eng yirik yadro arsenaliga ega, ammo yadroviy kuchini oshirishni davom etmoqda”. U Szyan AQShni “global yadroviy xatarning yirik manbasi” deb atagan.
Pentagon hisoboti 3-noyabr kuni e’lon qilingan. Unda aytilishicha, Xitoy 2027-yilga qadar qurollanishga 700 ta yadro kallagini yetkazib berishni, 2030-yilga borib esa ularning sonini mingga yetkazishni rejalashtirmoqda.
Avvalroq Xitoy AQShni Tayvan bilan rasmiy aloqalarini zudlik bilan to‘xtatishga, shuningdek, sovuq urush mentalitetidan voz kechib, XXRga xayoliy raqib sifatida munosabatda bo‘lishni bas qilishga chaqirgandi.
Izoh (0)