Европа Чемпионлар Лигаси гуруҳ босқичининг 4-тур ўйинлари 2 ва 3 ноябрь кунлари бўлиб ўтди. Мазкур турдан кейин «Ювентус», «Бавария», «Ливерпуль» ва «Манчестер Сити» кейинги босқич йўлланмасини муддатидан аввал ҳал қилди. «ПСЖ», «Барселона» ва «Реал» кейинги турда ушбу вазифани бажариши мумкин. «Челси» эса кейинги икки турда 1 очко қўлга киритса ҳам, плей-офф йўлланмасини қўлга киритади. «Дарё» Чемпионлар Лигаси гуруҳларидаги айни вақтдаги ҳолат ҳақида маълумот беради.
А гуруҳи
«Манчестер Сити» 9 очко билан гуруҳда пешқадам бўлиб турибди ва плей-офф йўлланмасини деярли ҳал қилган. Иккинчи ўринда кетаётган «ПСЖ»нинг очколари сони 8 та. 5-тур доирасидаги «Манчестер Сити» ва «ПСЖ» жамоалари ўртасидаги ўйин катта эҳтимол билан гуруҳ пешқадами номини аниқлаб беради. «Брюгге» эса 4 очко билан Европа Лигасига йўлланма берувчи учинчи ўринда жойлашган. Гуруҳ аутсайдери «Лейпциг» (1) эса плей-офф йўлланмасини қўлга киритиш учун имкониятни йўқотди ва 3-ўрин учун кураш олиб боради.
B гуруҳи
«Ливерпуль» 12 очко билан якка пешқадам бўлиб турибди. Юрген Клопп шогирдлари охирги икки турда «Атлетико» устидан ишончли ғалабалар қайд этди ва плей-офф йўлланмасидан ташқари биринчи ўрин масаласини ҳам ҳал қилди. Иккинчи ўринда бораётган «Порту» ҳисобида 5 очко мавжуд. Кейинги икки турда ғалаба қайд этса, Португалия жамоаси гуруҳдан чиқа олади. Учинчи ўриндаги «Атлетико»да эса 4 очко бор. «Милан» жамоаси 1 очко билан сўнгги ўриндан жой олган. «Россонерилар» назарий жиҳатдан плей-оффга йўл олиш имконияти сақланиб қолмоқда, бироқ бу қолган жамоаларнинг натижаларига ҳам боғлиқ бўлади.
С гуруҳи
«Аякс» C гуруҳида 12 очко билан етакчи бўлиб турибди ва плей-офф босқичини расман ҳал қилди. Иккинчи ўриндаги «Спортинг» ва учинчи ўриндаги «Боруссия Д» бир хил 6 очкодан жамғарган, улар иккинчи йўлланма учун кураш олиб боради. Тўртинчи ўриндаги «Бешиктош» ортда қолган 4 та турда ҳам мағлуб бўлди ва 3-ўрин масаласини ҳам катта сўроқ остида қолдирди.
D гуруҳи
«Реал» очколари сонини 9 тага етказиб, кейинги босқичга чиқиш учун имкониятларини оширди. Иккинчи ўринда бораётган «Интер»да 7 очко мавжуд ва биринчи ўрин учун мадридликлар билан баҳс олиб боради. Учинчи ўринда турган «Шериф»да ҳам плей-офф учун имконият мавжуд. Молдова жамоаси ҳисобида 6 очко бор. Украинанинг «Шахтёр» жамоаси 4 турдан сўнг 1 очко билан гуруҳ аутсайдери бўлиб турибди. «Шахтёр» кейинги турларда Европа Лигаси йўлланмаси учун курашади.
E гуруҳи
E гуруҳида Мюнхеннинг «Бавария» жамоаси 12 очко билан пешқадамлик қилмоқда ва плей-офф йўлланмасини муддатидан олдин ҳал қилди. Иккинчи ўринда бораётган «Барселона» ҳисобида эса 6 очко мавжуд. Каталонияликлар кейинги турда «Бенфика» устидан ғалаба қозона олса, кейинги босқичга чиққан иккинчи жамоага айланади. Учинчи ўриндаги «Бенфика»да эса 4 очко мавжуд. Киевнинг «Динамо»си 1 очко билан тўртинчи ўриндан жой олган.
F гуруҳи
F гуруҳида «Вильярреал» 7 очко билан биринчи ўринни эгаллаб турибди. «Манчестер Юнайтед»да ҳам худди шунча очко мавжуд, аммо Оле-Гуннар Сульшер шогирдлари қўшимча кўрсаткичлар эвазига иккинчи ўриндан жой олган. Италиянинг «Аталанта» жамоаси 5 очко билан учинчи ўринда, 3 очко жамғарган «Янг Бойс» эса 4-поғонада бормоқда. Ушбу гуруҳда ҳар бир жамоа кейинги босқичга чиқиш имкониятини сақлаб турибди.
G гуруҳи
Кураш қизғин кечаётган G гуруҳида «Зальцбург» 7 очко билан биринчи ўринда турибди. Иккинчи ўринда бораётган «Лилль» жамоасида эса 5 очко мавжуд. «Вольфсбург» ҳам 5 очко жамғарди ва учинчи ўринни эгаллаб турибди. Испаниянинг «Севилья» жамоаси 3 очко билан аутсайдерга айланди. Назарий жиҳатдан ҳар бир жамоада плей-офф йўлланмасини қўлга киритиш учун имконият мавжуд.
H гуруҳи
H гуруҳида «Ювентус» 4 та ўйиннинг барчасида ғалаба қозонди ва плей-оффга чиқиш вазифасини муддатидан аввал ҳал қилди. Иккинчи ўринда «Челси» бормоқда ва Томас Тухель шогирдлари 9 очко жамғарди. Кейинги турларда қўлга киритилган ҳар қандай очко лондонликларни кейинги босқичга олиб чиқади. Учинчи ўринда бораётган «Зенит» ҳисобида 3 очко бор ва улар Европа Лигаси учун йўлланма берувчи ўринда қолиш учун кураш олиб боради. Бу учун унга 4 турдан сўнг бирорта очко жамғара олмаган «Малмё» халақит қилиши мумкин.
Маъруфжон Очилов тайёрлади
Изоҳ (0)