Dunyo va o‘zbek sportiga oid 3-noyabr kunining eng muhim xabarlari dayjesti bilan tanishing.
O‘zbekiston
2020-yilda 31 nafar sportchi OTMlarga qalbaki hujjat bilan o‘qishga kirgani aniqlandi2020-yilda 31 nafar sportchi qalbaki hujjatlar asosida oliy ta’lim muassasalariga imtiyozli ravishda qabul qilinganligi aniqlangan.
Qayd etilishicha, milliy chempionatlarni o‘tkazish jarayonini elektronlashtirish, video va foto tasvirga olish tizimli yo‘lga qo‘yilmasdan, barcha hujjatlar qog‘oz shaklida yuritib kelingan. Bu esa musobaqalar natijalarini jamoatchilik uchun ochiq va shaffof bo‘lishini ta’minlamay, ayrim sport murabbiylari tomonidan musobaqa natijalari soxtalashtirishiga imkon yaratgan. Birgina 2020-yilda 31 nafar sportchi qalbaki hujjatlar asosida oliy ta’lim muassasalariga imtiyozli ravishda qabul qilinganligi aniqlangan.
Shu bilan birga 2021-yilda o‘tkazilgan baydarka va kanoeda eshkak eshish hamda voleybol musobaqalari natijalari bo‘yicha haqiqatda g‘oliblikni qo‘lga kiritmagan 7 nafar sportchiga imtiyozlar taqdim etilgan. Yig‘ilishda mazkur holatlar yuzasidan tergovga qadar tekshiruv o‘tkazilayotgani aytildi.
O‘zbekiston milliy terma jamoasining noyabr oyidagi yig‘inida ishtirok etadigan tarkibi e’lon qilindi
O‘zbekiston milliy terma jamoasining 8-noyabrdan 16-noyabrga qadar FIFA kunlari doirasida o‘tkaziladigan yig‘iniga chaqirilgan futbolchilar ma’lum qilindi.
Srekcho Katanes Toshkent va Tbilisi shaharlarida o‘tkaziladigan o‘quv-mashg‘ulot yig‘iniga 24 nafar futbolchini jalb etdi. To‘liq ro‘yxat bilan bu yerda tanishish mumkin.
Jahon
Dembele “Barselona”da qolmoqchi
Hujumkor yarim himoyachi Usmon Dembele “Barselona”da qolmoqchi, deb yozmoqda Diario Sport.
Ma’lum qilinishicha, 24 yoshli fransuz o‘z yaqinlariga kataloniyaliklar bilan shartnomani uzaytirish istagi borligini aytgan. Hozirda tomonlar yangi kelishuv ustida ishlayotgani aytilmoqda, muzokaralar yakuniy bosqichda.
Usmonning klub bilan amaldagi shartnomasi ushbu mavsum oxirida o‘z nihoyasiga yetadi.
“Bavariya” “PSJ”ning 3 yil oldingi rekordini takrorladi
“Bavariya” Chempionlar Ligasi guruh bosqichining 4-turida “Benfika”ni 5:2 hisobida mag‘lub etdi.
Myunxen klubi joriy mavsumda musobaqaning to‘rt o‘yinida 17 ta gol urdi va 2 ta gol o‘tkazib yubordi.
Shu tariqa “Bavariya” “PSJ”ning 2017/18-yilgi mavsumdagi rekordini takrorladi. Parijliklar ham o‘sha yili musobaqaning dastlabki 4 o‘yinida 17 ta gol urgandi.
Qayd etish kerak, nemis klubi 3-noyabr kuni muddatidan avval Chempionlar Ligasining 1/8 finaliga chiqdi.
Ronaldu “Manchester Yunayted” safidagi gollar borasida Sulsherdan o‘zib ketdi
“Manchester Yunayted” hujumchisi Krishtianu Ronaldu Chempionlar Ligasi doirasidagi “Atalanta”ga qarshi o‘yinda (2:2) ikkita gol urdi.
36 yoshli futbolchi uchun bu “Manchester Yunayted” safidagi 126 va 127-gollar bo‘ldi. Bu ko‘rsatkichga erishish uchun Ronalduga 303 ta o‘yin kerak bo‘ldi.
“Manchester Yunayted” safida urilgan gollar soni bo‘yicha portugaliyalik jamoa bosh murabbiyi Ole-Gunnar Sulsherni ortda qoldirdi. Sulsher 1996—2007-yillarda 366 o‘yinda 126 ta gol urgan.
Ronalduning Chempionlar Ligasidagi gollari soni esa 139 taga yetdi. Ikkinchi o‘rindagi Lionel Messining hisobida 123 ta gol bor.
Varan 3—4 haftaga safdan chiqdi
“Manchester Yunayted” himoyachisi Rafael Varan Chempionlar Ligasi guruh bosqichi 4-turi doirasidagi “Atalanta”ga qarshi o‘yinda (2:2) tizzasidan jarohat oldi.
U uchrashuvning 38-daqiqasida almashtirildi. L’Equipe’ga ko‘ra, himoyachining tiklanishi uchun 3—4 hafta kerak bo‘ladi.
Varanning qaytishi uchun optimal sana sifatida 30-noyabr ko‘rsatilmoqda. “Qizillar” o‘sha kuni “Arsenal”ga qarshi o‘yin o‘tkazadi.
Yanada ko‘proq futbol va sport yangiliklaridan boxabar bo‘lishni istasangiz, “Daryo”ning Telegram’dagi rasmiy sport kanali — @Daryo_Sport24’ga obuna bo‘ling!
Izoh (0)