Тошкентда иссиқлик электр марказида инвестиция лойиҳасини амалга ошириш бўйича Туркиянинг Çalik Enerji компанияси билан шартнома имзоланди, дея хабар қилмоқда «Иссиқлик электр станциялари» матбуот хизмати.
Маълум қилинишича, 2024 йилга қадар марказда ҳар бирининг қуввати 32 мегаватт бўлган иккита газ турбина қурилмаси бунёд этилади ва лойиҳанинг бош пудратчиси сифатида Туркиянинг Çalik Enerji компанияси иштирок этади.
«Ўйлайманки лойиҳани юқори уюшқоқлик билан ташкил қиламиз ва мамлакат энерготизимини ривожлантиришга ҳисса қўшамиз», – деди лойиҳа менежери Заҳид Аричи.
Лойиҳанинг умумий қиймати – 109, 243 миллион доллар, шундан:
- Япониянинг халқаро ҳамкорлик агентлиги (JICA) маблағлари – 81,06 миллион доллар;
- Корхонанинг ўз маблағлари – 15,46 миллион доллар;
- Ўзбекистоннинг қўшган улуши – 12,71 миллион долларни ташкил қилади.
Бундан аввал Ўзбекистон аҳолиси иссиқлик энергиясидан 2,1 трлн сўм қарздорлиги маълум қилингани, Ўзбекистонда иссиқлик тармоқларининг 60 фоизи таъмирталаб аҳволда экани ҳамда Тошкент шаҳрининг иссиқлик таъминоти бошқаруви 30 йилга Франциянинг Veolia компаниясига берилгани ҳақида хабар берилганди.
Изоҳ (0)